Arthro magsagubang og daghang  pagsulay

Magsagubang og daghan nga pagsulay ang  Arthro Kontra Arthritis basketball team ni long time sports patron Jonathan 'Atan' Guardo ug mapi-it sa mga nagkadinang mga duwa sa mosunod nga mga semana gumikan kay mosalmot  man og mga liga.

Ang Arthro squad ni coach Al Solis migikan paingon sa Surigao del Sur kagabii aron mokumbati sa 2007 Mindanao Visayas Basketball Association (MVBA) First Conference champion Holcim Pryce Pharma MisOr ugma didto sa lungsod sa Cantilan.

Gikan sa Cantilan, ang  team  ni Sambag I  barangay captain Jerry  L. Guardo molarga padung sa Davao City aron mosalmot sa Davao Open Kadayawan Festival nga gitakda karong Agosto 16-19.

Ang Arthro manulong og balik sa Surigao aron ilang harungon ang Montaña Pawnshop Jewels sa Surigao Kitcharao best-of-three series karong Agosto 21-23.

Ang Arthro mobalik dinhi sa Sugbu aron mo-ilog sa taas nga dungog sa 1st Bogo City Mayor's Cup Open Basketball  Tournament nga gipasiugdahan ni Bogo City Mayor Celestino 'Junnie' Martinez Jr. uban sa pakig-alayon sa Hotel Fortuna ni BAP-SBP Cebu Province director Lorenzo 'Chao' Sy karong Agosto 30 hangtod sa Septiyembre 3 didto sa Don Celestino Martinez, Sr. Memorial Coliseum.

Human sa Bogo, ang Arthro mobiyahe  sa Talisay City diin adto na sab kini mopakita'g aksiyon sa ipahigayong Talisay Open tournament nga mosikad karong Septiyembre 4-12.

Ang Arthro nagtinguha sab nga mo-ilog sa korona sa 2007 MVBA Second Conference nga sugdan karong Septiyembre 13.

Sa katibuk-an, ang Arthro mihipos og upat ka championship crown sud ning tuiga -- ang Cebu City Charter Cup MBVA Pre-season Games,  Mayor Rodrigo Duterte Invitational "Araw ng Dabaw," 2007 MVBA First Conference Visayas Division  ug ning bag-o ang 2007 Cateel Town Fiesta Invitational.

Midaog sab ang Arthro og lima sa unom nila ka duwa batok sa gikalisangan nga M. Lhuillier Kwarta Padala ning tuiga.