Ang M. Lhuillier Sports Development Foundation (MLSDF) All-Stars nakabangon human mahisukamod sa unang hugna aron pagmakmak niini sa Tacloban City Volleyball Club (TCVC), 2-1, ug pag-angkon og awtomatik nga luna sa kampiyonato sa 7th Maasin City Charter Day Open and Invitational Volleyball Tournament didto sa Maasin City Gym.
Ubos sa pagpangulo sa duha ka kanhi RP Team players nga sila si Michelle Laborte ug Michelle Carolino, ang pambato sa Tacloban mipakugang sa bisitang Sugbuanon sa unang set, 25-17.
Apan inay nga maluya, nadasig hinuon ang MLSDF All-Stars hinungdan nga giharos nila og daog ang duha ka sets, 26-24, 25-22 aron pag-abante ngadto sa kampiyonato kortesiya nilang Kennette Garces, Mechelle Matuguina, Joren Sanchez, Jusabelle Brillo, Janez Armie Igot ug Kimberly Gendrauli.
Ang MLSDF All-Stars ni MLSDF executive director Eddie B. Ybañez nagabaton og "twice-to-beat" incentive sa finals diin ilang ikasangka ang modaog sa tinaktakay nga duwa tali sa Tacloban ug Maasin City Selection.
Ang makampiyon sa maong torneyo nga gi-organisar sa Maasin City Sports Commission ubos sa liderato ni Mayor Maloney L. Samaco mobitbit og P15,000. Ang mopahiluna sa ikaduhang makaangkon og P10,000 ug ang ikatulong makadawat og P7,000.