Ang maayong diskarte
Kausa niana nahisgutan nato dinhi ning maong lindog ang mahitungod sa maayong diskarte sa pagdula og billiard. Atong gi-emphasize pag-ayo ang kamahinungdanon sa husstong diskarte aro modaog sa panagsangka.
* * *
Duna siya'y namatikdan nga kakulian sa iyang pagdula. Gihulagway niya ang iyang performance sa dula nga "maayo kun walay pusta." Nasuta man gud niya, sa kaugalingon niyang assessment sa dula, nga maayo siya'g performance kun modula siya nga walay pusta. Pero kun aduna na gani pusta, dili na magkadimao ang iyang dinulaan. Kanunay nang mosipyat ang iyang mga tayada. Kini iyang gikahibudngan kay dili man kini niya tuyoon. Mao nga gusto niya kining korehian.
* * *
Ang una nakong ikasugyot mahitungod niini mao nga angay kontrolahon sa magdudula ang iyang hunahuna kun siya nakasinati og ingon niini nga kakulian sa pagdula nga "maayo lang kun walay pusta." Posible man gud nga nabutangan og pressure ang iyang hunahuna sa iyang pagdula nga may pusta. Kana bang matang sa panghunahuna nga mora'g dili na hinuon mahinultol sa angay buhaton kun pastaanay na ang dula kay naghingapin ang kabalaka nga mapilde ang kantidad nga gipusta. Resulta, mapilde gyud hinuon kay dili na man magkadimao ang pagdula.
* * *
Sa laing bahin, angay sab i-relax sa magdudula ang tensiyon sa iyang kamot atol sa iyang pagdula. Saykolohikal man gud ang dula. Usahay mapilde ka sa actual play tungod sa negatibong panghunahuna. May mga higayon nga sa tantong paneguro mahulog na hinuon sa pagkapildero. Mao nga ang tinamod nga sportsperson nga si Ashok Kumar miingon nga kinahanglang i-relax sa magdudula ang iyang kaugalingon aron hapsay ang sistema sa iyang pagdula.
May pusta man o wala, angay nga consistent ang performance sa magdudula. Kini ang sekreto sa epektibong pagdula.
* * *
(Mga sugyot ug pakisayod? Text sa 0910-8105522)
- Latest
- Trending
