Tinguha sa Cebu Blue Marlins Swimming Club nga mohakot og daog sa ila unyang pagsalmot sa Silliman University Founder's Day Age-group Swimming Competition nga gitakda gikan sa Agosto 23-25 didto sa Shaw Memorial Swimming pool sa Dumaguete City.
Si head coach Rolando Alvarez nagkanayon nga pito ka tuig na karon gikan sa ilang katapusang pagsalmot hinungdan nga naghinam-hinam na kini sa ilang pagbalik sa maong event.
Kasagaran sa mga pambato ni Alvarez alang sa bulawan nagagikan sa University of Cebu nga mao ang managsuong Cañeda nga sila si Noel, Trina ug Diane, Paula ug Michael David Vega, Jeffrey Yana, Unity Venus Labiste, Marlon ug Matheus Caesar Galo ug Todd Aris Belleza.
Si Trina Cañeda maoy ibala sa 12-under class uban nilang Kaithlin Capacio ug Patricia Mae Baguio diin ang iyang igsuon nga si Noel molangoy sa 15-17 class uban sab nilang Jeffrey Yana ug Matheus Caesar Galo, Labiste ug Vega.
Si Diane Cañeda, bisan og wala mokompirmar sa iyang partisipasyon, molangoy sa 18-19 class uban nilang Eldy Banluta, Marlon Galo ug Belleza.
Sa laing bahin, si Paula Vega, mopakita sa iyang katakus sa 15-17 class uban ni Mary Arlette Baller.
Ang lain pang mga pambato sa CBM naglakip nilang Yuan Chiongbian, Renan Tapang ug Anthony Navarro II sa 6-under class, Lyh Ann Navarro sa 7-8 class.
Mosikad sa 9-10 class mao silang Anthony Linn Navarro, Israel David, Serge Biscocho, Beth May Arellano ug Danielle Mae Ballesteros.