USP-F spikers nagpabiling buhi sa Shakey's Volleyball

Nalangay og usa ka oras ang duwa sa University of Southern Philippines-Foundation (USP-F) ug sa Iloilo Central Philippine University (ICPU) apan nagbunga ang ilang pag-antos nga paghuwat human kini midaog sud sa tulo ka sets aron magpabiling buhi sa ilang kampanya sa kampiyonato sa

Shakey’s Girls Volleyball League-Tournament of the Champions didto sa University of St.La Salle-Integrated School sa Bacolod City.

Ang USP-F spikers midaog sa iskor nga  25-13, 25-22, 25-19

Mipadayag si USP-F  coach Jordan Paca nga gipangandaman gayod nila og maayo ang maong duwa aron makabangon sa ilang kaparotan batok sa Hope Christian School sa tulo ka set sa miaging adlaw.

Ang USP-F miarangkada didto sa” City of Smiles” uban ang kulbahinam nga kadaugan batok sa host University of St. La Salle-Integrated School, 3-1.

Bisan nagtangag og 2-1 win-loss record,  ang USP-F girls nag-agad  sa dagan sa maong liga

Kun ang host USLS modaog tali sa HCS mameligro ang sitwasyon sa USP-F kay pulos man unya kini magtangag og 2-1 win-loss record.  Pananglit mahitabo, ang maong panagtabla daugon pinaagi sa quotient system.

Bugtong paglaum sa USP-F  mao nga mag-ampo kini nga madisgrasya ang USLS  sa HCS aron hamugaway ug hapsay ang ilang pagsulod sa final.