Thirsty Juices & Shakes gipug-an
Walay makatupong sa gipakitang kabangis sa Globe Acabar dihang ilang gipug-an og maayo ang Thirsty Juices and Shakes sa iskor nga 98-48 aron paglingkod sa liderato sa 6th Thirsty Inter-company basketball tournament didto sa Bright Academy Gym sa Brgy. Banilad, ning dakbayan.
Ang Globe Acabar nibugwak dayon sa ilang nagdilaab nga mga puntos pagbukas sa duwa aron pagposte og 48-29 nga labaw, human sa unang-tunga.
Ang uhaw nga Globe milupig sa Thirsty sa pinuntosay, 30-13 sa ikatulong kuwarter sa wala pa nila tak-opa ang maong duwa pinaagi sa pagpabuto og 20-6 aron pagkompleto sa 50 puntos nga lubong.
Si Nestor Bardillas miposte og game-high 22 puntos, samtang sila si Tommy Abasolo ug Nestor Atillo nagkumboya og 29 puntos alang sa Globe Acabar nga kasamtangang nagtangag og 4-0 win-loss record.
Si Julius Gaviola maoy nangulo sa Thirsty uban ang 19 puntos, gisundan ni Giovani Nagaliza sa iyang 15 puntos.
Sa laing duwa, ang KIA Motors nakaipsot sa PS Bank sa kulbahinam kaayo nga duwa sa iskor nga 75-74.
Ang KIA Motors gibiyaan og nuybe puntos human sa third quarter, 49-58 apan nakahigayon milusad kini og 29-19 nga rally sa katapusang kuwarter aron pagpukan sa PS Bank.
Si Erwin Francisco maoy nangulo sa KIA Motors nga adunay game high 32 puntos, samtang sila si Cyrus Zoleta ug Leander Cabahug nagkumboya og 24 puntos.
- Latest
- Trending
