Kung mahitungod lang sa partisipasyon ang hisgutan, wala’y nakitang kakulian ug wala’y angay kabalak-an ang sports leader/ promoter nga si Lorenzo 'Chao' Sy, tag-iya sa La Fortuna Bakery kay daghan ang misanong sa iyang imbitasyon.
Matud pa ni Sy nga iya nang gikahinabi ang ubang mga lider sa mga siyudad nga iyang gihatagan og imbitasyon.
Sa kasamtangan, aprubado na ang iyang imbitasyon sa dakbayan saTalisay, Toledo, Carcar, Lapulapu, Mandaue, Danao ug Bogo. Ang Cebu City wala pa mahatagi og imbitasyon.
Si Sy nagkanayon nga iya nang nahinabi si konsehal Rudy Cabigas sa Talisay, Mayor Celestino Martinez, Jr. sa Bogo, Jonas Cortes sa Mandaue, Mario Patricio Barcenas sa Carcar ug Arlene Zambo sa Toledo.
Wala pa niya mahinabi si Oscar 'Boying' Rodriguez, ang tsirman sa sports committee sa Danao kay tua pa man kini sa Estados Unidos.
Mitug-an si Sy nga magkita sila ni Harry Radaza, pag-umangkon ni Mayor Arturo Radaza sa Lapulapu City karong Agosto 3. Iya sab nga hinabion silang Mayor Zambo ug Mayor Tomas Osmeña.
Ang torneyo himuon nga home-and-away format ug ang tanang makolekta sa gym iyaha na sa mo-host sa duwa apan sila usab maoy mogasto sa ilang team sa panahon nga moduwa kini sa laing lugar.