Si Mark Jason Melligen sa ALA Boxing Gym milampus pagdepensa sa iyang RP light welterweight title human gipasurender si Jury Noda pagsugod sa ikapitong human sa main event sa Sandugo 2007 Punch Fest sa miaging gabii didto sa Island City Mall carpark sa dakbayan sa Tagbilaran.
Mao kadto ang labing unang pagpanalipod ni Melligen sa trono nga iyang nasakmit human palukapaha ang beteranong si Chris Saluday sa ikapitong hugna niadtong Abril didto sa dakbayan sa Victorias sa Negros Occidental.
Sa wala pa makigharong ni Noda, si Melligen misuway og ilog sa WBO Asia Pacific jr welterweight title apan napilde kini sa Koreanong kampiyon nga si Young Sung Kim pinaagi sa TKO sa ikapitong hugna niadtong Pebrero didto sa South Korea.
Sa kasamtangan, bakanti ang WBO AsPac title gumikan kay nahubo-an man sa iyang bakos si Young gumikan kay wala makakuha sa eksaktong timbang nga 140 ka libras sa iyang pagdepensa batok ni Thai Kongtoranee Por Surasak niadtong Sabado sa higanteng boxing card diha sa grand ballroom sa Waterfront-Cebu City Hotel. Si Young mikulit og one-punch knockout ni Kongtoranee sa ikalimang hugna hinungdan nga gi-deklara nga bakanti ang titulo.
Sa undercards sa Sandugo boxing nga gipasiugdahan sa SGG Sports Promotions ni international promoter Sammy Gello-ani inabagan sa kagamhanan sa dakbayan sa Tagbilaran ubos sa liderato ni Mayor Dan Neri Lim, si Leon Maratas mipa-undang ni Ronald Postrano pagsugod sa ikapitong hugna, samtang si ALA Boy Joseph Omanz mirehistro sa labing sayo nga away human gipatukay-ang niini si Arnel Layson sa oras nga 2:33 sa unang hugna.
Sila si Nicolas Banal ug Federico Catubay mipilde nilang Tiny Tyson ug Roy Doliguez pulos pinaagi sa unanimous decision sud sa walo ka hugna.
Impresibo sab kaayo si Carlos Magale sa pagpatikangkang niini ni Jun Intor sa ikaduhang hugna, samtang si Ricky Sismundo ug Mark Gil Melligen mibuntog nilang Rolando Econas ug Romano Gelig pinaagi sa unanimous decision.