Dengcoy bags award in Asia publishing tilt

Gipahayagan sa Talk N' Txt Phone Pals ang ilang tinguha nga molabni og luna sa semifinals human ilang gimakmak ang Sta. Lucia Realtors, 114-102, alang sa ikaupat nilang sunod-sunod nga daog sa Talk N' Txt PBA Fiesta Conference kagahapon didto sa Araneta Coliseum.

Niining pagsuwat, nagpadayon pa ang duwa tali sa Barangay Ginebra Kings batok sa San Miguel Beer diin naglaraw ang Gin Kings nga makigsawo sa liderato uban ang Red Bull Barako nga mao ang kasamtangang naghari bitbit ang 12-5 win-loss record.

Ang import sa Phone Pals nga si JJ Sullinger nagpakita na usab sa iyang katakos pinaagi sa paghipos ug 35 puntos nga naka-ambag og maayo aron pag-inar sa ilang baraha ngadto sa 11-6.

Sa kasamtangan, hayag na kaayo ang panglantaw sa Phone Pals nga maka-abante ngadto sa semifinals ilabi na ko modaug sa kataposan nilang tahas batok sa San Miguel Beer karong Hunyo 3.

Mao kadto ang ikatulong sunod-sunod nga higayon nga mihakot si Sullinger og 35 puntos, timaan sa nag-oros oros niyang kainit. Mipugnit sab siya og unom ka assists ug lima ka rebounds.

Yano ra kaayong gilupig ni Sullinger sa ilang match-up ang import sa Sta. Lucia nga si Jamaal Williams nga mi-iskor lang ug 19 puntos.

Ang Realtors nakatilaw sa ika-12 niining kapildihan nga gi-atbangan og lima lamang ka daog. Nanghinaut sila nga maka-angkon og luna sa wildcard pagsugod sa PBA playoffs sunod semana.

Nagbinaylo-ay sa paglabaw ang duha ka koponan sud sa third quarter apan ang Phone Pals mitapos sa maong kuwarter nga labaw og sayes puntos, 86-80.

Bisag unsa-on pagpaninguha sa Realtors pag-apas, wala gayud molurang ang kainit sa Phone Pals nga milabaw pa gani ug 14 puntos, 98-84, sa sayong bahin sa katapusang 10 minutos sa duwa.

Si Dennis Espinosa kinsa na-fouled out sa kataposang 43.3 segundos sa duwa, maoy nagsunod ni Williams bitbit ang 17 puntos.