Sa iyang sinulat nga nag-ulohan og "Improving Your Game," si Alice Rim, billiard columnist sa website nga Azbilliards.com, miingon nga aron mo-improve ang kalidad sa imong dinulaan, dili maayo nga mao ray balik-balikan nimo sa pagbansay ang mga tayada nga imo nang naandan. Gikinahanglan mo ang kakugi sa pagdiskobre og dugang mga diskarte sa dula aron matawag nga hitsas ug kompleto ang imong toolbox.
Sumala pa ni Rim, importante ang regular practice session sa usa ka magdudula. Gidasonan nato ang mao niyang argumento hinungdan nga kanunay natong hisgutan ang bahin sa regular nga pagbansay dinhi sa atong lindog. Apan dili igo ang yano nga pagbansay. Kinahanglan nga adventurous ang magdudula sa iyang pagbansay. Ingon niini, Bords, ang angay mong buhaton. Kinahanglang magkugi ka sa pagdiskobre og dugang mga diskarte sa dula aron mas preparado ka sa sunod nimong pakigsangka.
Gipadayag ni Rim nga walay magdudula dinhi sa atong planeta nga magbaton og kompletong kahanas sa natad sa disiplina nga iyang gikahiligan. Bisan ang atong giila nga labing hanas nga magdudula adunay kahuyang. Adunay pagkulang. Kini tungod kay wala may tawo nga perpekto. Ug kay ang magdudula tawo man lang, dayag na lang nga dili siya perpekto, busa, dili usab matawag nga perpekto ang iyang mga buhat.
Sila si Efren ''Bata'' Reyes, Francisco ''Django'' Bustamante, Alex ''The Lion'' Pagulayan, Ronnie Alcano, Dennis Orcullo, Warren Kiamco, Antonio Gabica, Lee Van Corteza ug ubang dekalibreng magdudula sa atong nasud kugihan kaayong magbansay. Dili man gud sila gustong mawagtang ang ilang consistency sa performance. Dili sila buot nga mawagtang ang ilang muscle memory maong magbansay gayod sila kanunay. Kun mohunong sila pagbansay, nasayod silang mapuhalan sila sa kugihang cue artists nga nagbase sa ubang kanasoran. Mao nga nagpadayon sila pagbansay.
Ilang namatud-an nga diha sa pagbansay, usahay dili lang tuyoan nga makadiskobre ka og bag-ong diskarte sa dula. Bag-ong taktika. Ug kini mapuslanon kaayo. Mao nga kun gusto kang mo-improve ang imong dinulaan, pagdiskobre og bag-ong mga taktika ug diskarte sa dula. Isipa kini nga imong obligasyon isip magdudula.
(Mga sugyot ug pakisayod? Text sa 0910-8105522)