Boom Boom hinog na, apan...

Human gi-anunsiyo ni ring announcer Michael Buffer nga si Floyd Mayweather maoy daog pinaagi sa split decision batok ni Oscar de la Hoya sa ilang away niadtong Domingo didto sa Las Vegas, misantop dayon sa akong huna-huna ang nahitabo sa Sugbuanong si Z Gorres sa iyang away batok sa Meksikanong si Fernando Montiel sa "Moment of Truth" card niadtong Pebrero 24 diha sa Cebu City Sports Center.

Si Gorres mibuhi og daghang mga kumo, samtang si Montiel, bisan og gamay ra ang gibuhian nga suntok, apan mipatama kini og solido ug hait nga mga kumo. Kontrolado ni Gorres ang away sud sa walo ka hugna apan mibahar kini sa katapusang upat ka hugna.

Human sa ilang engkuwentro, si Montiel maoy gideklarar nga mananaog pinaagi sa split decision. Daghan ang dili makatuo sa desisyon. Ang uban nakugang ilabi na kay ang manedyer ni Gorres nga si Antonio ''Bidoy'' L. Aldeguer mao man ang promoter sa maong away.

* * *

Ang nahitabo ni Gorres sa iyang away batok ni Montiel way kalainan sa nadangatan ni de la Hoya sa mga kamot ni Mayweather. Gikan sa sinugdanan, agresibo kaayo siya nga mi-atake ni Pretty Boy. Apan wala kadut ang mga suntok ni de la Hoya sa lig-on nga si Mayweather.

Naunay sa iyang pagka-agresibo si de la Hoya gumikan kay nimenor man ang iyang kusog sa katapusang lima ka hugna. Sa dihang gibasa na ang mga iskor sa judges, si Mayweather maoy mipatigbabaw sa duha ka scorecards hinungdan sa iyang kadaugan pinaagi sa split decision. Daghan ang nakurat sa gipakita ni de la Hoya, nagtuo sila nga mao kini ang modaog. Labaw sa tanan, si Golden Boy sab ang nagpasiugda sa maong promosyon.

Ngadto sa wala makatuo nga napilde si de la Hoya, seguro mao sab ang inyong gibati sa dihang si Gorres gibuntog ni Montiel. Ako mismo nahugno akong dughan sa kaparotan ni Gorres, apan para nako si Montiel angayan nga hatagan sa maong kadaugan tungod sa dalaygon nga abilidad nga iyang gipakita niadtong awaya. Mao sab kini ang akong tan-aw ni Mayweather, nga milusad og maanindot kaayong stratehiya ug inutok nga taktika nga nakapalibog og maayo ni de la Hoya.

* * *

Sa akong obserbasyon, ang garbo sa mga Boholano nga si Rey ''Boom Boom'' Bautista andam ug hinog na kaayo alang sa usa ka world championship fight. Gani giplano na karon ang iyang paghagit ni WBO super bantamweight champion Daniel Ponce de Leon sa Mexico unya sa World Cup of Boxing nga tentatibong gitakda karong Agosto 25 dinhi sa Sugbu.

Sa abilidad, talento ug kusog, walay lalis nga si Bautista nagabaton niining tanan. Kaisog, kasingkasing ug determinasyon, anaa sab si Boom Boom. Una na niyang gipakita sa dihang nakabangon siya human matumba ug nagkalipong-lipong sa ikaduhang hugna dayon na ngadto sa pagpukan sa Meksikanong si Gerardo Espinosa pinaagi sa unanimous decision niadtong bisperas sa Pasko tuig 2005 didto sa Sycuan Resort and Casino sa El Cajon, California.

Sa undercard sa bugno nilang de la Hoya ug Mayweather, gipakita na sab ni Bautista ang iyang kalig-on human siya naka-rekober dihang hapit kini matumba sa ikapitong hugna dihang gidabodabohan kini ni Sergio Manuel Medina sa Argentina.

Nakabawi si Bautista ug gani gitumba pa niya si Medina sa ika-11 nga hugna dayon na ngadto sa paglansang sa ika-unom niyang daog didto sa Amerika pinaagi sa unanimous decision.

Impresibo kaayo si Bautista apan para nako kinahanglan pa nga i-improve niya ang iyang depensa ug ingon man itanom sa iyang dughan ug galamhan kanang gitawag nga "killer instinct" nga wala niya mayagyag sa iyang away batok ni Medina.

Depensa ug ‘killer instinct’ pulos mahinungdanong elemento paghulma og usa ka kompletong boksingero. Kinahanglan nga kining duha i-develop og maayo ni Bautista aron matuman niya ang iyang damgo nga ma-world champion.

* * *

Alang sa inyong mga reaksiyon, mahimong mo-email sa [email protected]