Pagpilde sa kontra

Kini ang tinguha sa matag magdudula. Ang pagpilde sa kontra maoy kanunay anaa sa hunahuna sa magdudula sa higayon nga siya magdula. Gusto siyang modaog. Ug buhaton niya ang tanan aron siya modaog. Kana maoy tinuod.

Usa ka magbabasa ning lindog mi-text nga nagkanayon: "Unsaon nako pagpilde ang kontra kun inigburak niya naay ma-shot unya katag kaayo ang mga bola? Thanks." -- 0910-9010904

* * *

Una sa tanan, ang angay mong buhaton mao ang paghulat sa imong turno sa pagtira. Samtang ikaw nagalingkod ug naghulat sa imong turno sa pagtira, obserbahig maayo ang mga lihok sa imong kontra. Estudyohi sa hilom ang iyang mga tayada aron imong matugkad ang iyang preparasyon sa dula.

Gikinahanglan mo ang konsentrasyon. Ang librong Snooker and Billiards nag-ingon: "You must concentrate when you are not at the table as much as when you are."

Klaro kaayo ang buot ipasabot sa maong pamahayag. Kinahanglang mo-concentrate ka sa tanang higayon. Dili lang sa panahon nga ikaw maoy motira nga kinahanglan kang mo-concentrate. Kinahanglang mo-concentrate ka bisan sa panahon nga ang imong kontra maoy motira aron dili ka malipat ug mabantayan mo ang iyang taktika sa dula.

* * *

Kun katag kaayo ang mga bola sa ibabaw sa lamesa, dili maayong magdali-dali ka pagtira. Kinahanglang analisahon una nimo''g maayo ang plastada sa mga bola aron pagsuta kun may makita ka bang opening alang sa imong preparasyon.

"Survey the table," midugang ang librong Snooker and Billiards. Lakaw ug tuyoka paglibot ang atubangan sa lamesa aron imong masil-ip ang plastada sa mga bola sa lain-laing anggulo niini. Pinaagi niini, imong makita kun aduna bay opening alang sa imong game plan. Ayaw gayod pagdali-dali sa pagtira. Sutaa una kun dili ba mameligro ang imong preparasyon kun ugaling mosipyat ka sa imong tayada.

* * *

Gumikan sa kakatag sa mga object ball ibabaw sa lamesa, may mga higayon nga wala kay makitang opening para sa imong game plan. Kun ingon niini ang sitwasyon, ang labing maayo mong buhaton mao ang paghimo''g safety play. Mosyugi ka. Kanang pagsyugi nga dili sab maghatag og pabor ngadto sa kontra.

* * *

(Mga sugyot ug pakisayod? Text sa 0910-8105522)