Doble panalo kuha ng UP

PASIG CITY — Isang doble panalo ang itinala ng University of the Philippines, na umaasam ng kanilang ikatlong sunod na titulo, makaraang igupo ang De La Salle University, 7-2 at Laguna 10-3 sa panimula ng ikatlo at huling yugto ng 32-in-1 softball championship na hatid ng Cebuana Lhuillier.

Sa unang laro ng UP, tumirada si Jocelyn Gonzales ng 3-run home-run at nag-ambag ng solo homerun si Alex Zuluaga para banderahan ang Lady Maroons sa 7-2 tagumpay.

Makalipas ang dalawang oras, nagbalik ang Lady Maroons upang itala ang kanilang ikalawang panalo laban naman sa Laguna, 10-3.

Sa laban naman sa kabilang grupo, bumanat ng one-run double sa 7th inning si Babel Cang na nagsilbing abante ng Ateneo sa kanilang 10-9 panalo laban sa Makati.

Umabante ang Lady Blue Eagles ng 7 runs sa 7th inning, 10-3, ngunit sa bottom ay bumirada ng anim na run ang Makati na napigilan ni starting pitcher na si Trisha Beloso nang patsihin niya ang huling batter. (Anatoly dela Cruz)