Ang Team Liloan ug Hiroshi mirehistro sa ilang ikaduhang sunod-sunod nga daog aron temporaryong maghari sa ilang tagsa-tagsa ka divisions sa 1st M. Lhuillier Kwarta Padala Open Indoor Volleyball Tournament niadtong Domingo diha sa Aznar Coliseum.
Human sa ilang malampusong pagpukan sa ML Pamilya Insurance Plans-backed University of the Visayas (UV) sulod sa lima ka sets sa milabay'ng Sabado atol sa season-opening diha sa USC-main gym, ang bisitang Liloan spikers nakalahutay sa ilang kulbahinam nga kumbati batok sa The Classical Touch aron pag-angkon og 3-2 nga kadaugan.
Ang Liloanons ni team owner Gerardo 'Dodong Gamay' Frasco, Jr. kasamtangan karong naghari sa men's class bitbit ang 2-0 ning usa ka buwan nga torneyo nga giumol sa M. Lhuillier Sports Development Foundation (MLSDF) ubos sa liderato ni executive director Eddie B. Ybañez.
Ang Classical Touch ni Alan Choachuy maoy miangkon sa unang duha ka sets, 21-25, 25-27.
Apan ang Liloanons ubos sa pagpangulo nilang Maynard Alejandrino ug Angelino Visoc mibangon aron pagpugos og rubbermatch diin ang Liloanons maoy mipatigbabaw sa deciding set.
Sa laing aksiyon, ang ML Cebu Dried Mango Delights-supported University of San Jose-Recoletos (USJ-R) ni coach Grace Antigua mibukas sa ilang kampanya pinaagi sa pagpukan sa UV sud sa tulo ka sets, 27-25, 28-26, 25-19.
Ang Hiroshi squad ni team owner Harou Iwanaga ug coach Ray Acojedo mipukan sa Kima Glass sa iskor sa tulo ka sets, 25-18, 25-19, 25-20.
Ang aksiyon mobalik karong Domingo diin aduna kini unom ka duwa diha sa UV o dili ba sa USP-F gyms.