Videotaping sa dula

Unsaon sa magdudula pag-assess sa kaugalingon niyang performance sa dula? Unsaon niya pagsuta nga maayo ang iyang dinulaan? Unsaon niya pagseguro nga superyor ang iyang performance ug wala nay mga aspeto nga angay korehian o palambuon?

Kinahanglang masayod ang magdudula sa tinud-anay nga kalidad sa iyang performance. Importante kaayo nga iyang masuta ang level sa iyang dinulaan. Mahinungdanon kaayo nga iyang mahibaw-an ang kalibre sa iyang performance sa dula.

* * *

Si Glenn Bond, usa ka respetadong magdudula ug billiard columnist sa website nga Azbilliards.com, miingon nga ang videotaping makatabang sa magdudula sa pag-assess sa iyang performance. Iya kining gipahimug-atan sa item sa iyang column nga nag-ulohan og "Videotaping Your Game" nga nagtuki sa kamahinungdanon sa videotaping aron ang usa ka magdudula maka-assess sa iyang performance sa dula.

Sa dulang boxing, ang usa ka boksidor motan-aw og video tape sa dula sa iyang kaatbang aron iyang masuta ang kalibre sa inawayan niini. Dili lang diay sa boxing applicable ang videotaping kondili lakip na sa billiards. Sa billiards, mahimong tun-an sab sa magdudula ang estratehiya sa iyang kaatbang aron makakuha siya''g ideya kun unsaon niya kini pag-alkontra pinaagi sa videotaping.

* * *

Pero dili kay kana ra. Sa videotaping, masuta usab sa magdudula kun unsay kalibre sa iyang dinulaan. Pinaagi sa pag-video tape sa kaugalingon niyang dinulaan, iyang makita ang iyang performance sa dula segun sa unsay nakuhang footage. Sa maukiton nga pagsuhid niini, masuta sa magdudula kun unsay kahuyang ug unsay kalig-on sa iyang dinulaan. Niini, makorehian niya ang iyang weaknesses sa pagdula.

Si Glenn Bond mismo mi-apply sa videotaping sa kaugalingon niyang pagdula tungod kay gusto niyang makita ang iyang performance ug matun-an ang mga aspeto nga medyo kulang sa kahugot ang iyang dinulaan. Dili igo alang kaniya ang footage nga makuha sa TV network nga mo-cover sa dula. Aduna gayod siya''y kaugalingong cameraman nga maoy mokuha''g video footage sa iyang pagdula. Nindot kining paagiha. Maayo unta kun ang tanang bilyaristang Pinoy maka-afford niini.

* * *

(Mga sugyot ug pakisayod? Text sa 0910-8105522)