Kandidatura ni Pacman

Makadaghan nako nagtuki dinhi sa akong lindog sa isyu kabahin sa pag-ambak ni Manny Pacquiao sa nataran sa bugnong lugaynon. Dili na unta ako mangahas pa paghisgut niini gumikan kay daghan na man kaayo ang mga reaksiyon nga gipadayag sa mga supak ug ingon man sa mga pabor sa pag-apil-apil ni Pacman sa politika.

Apan karon, naaghat ko pag-utingkay og balik ning maong isyu gumikan kay nakadawat man kita og opinyon gikan ni Ms. Jennibeth Duerme, usa ka empleyado sa Snaplight Digital Studio sa Salinas Drive, Brgy. Lahug.

Sa iyang e-mail dinhi sa Knak Awt, si Ms. Duerme mi-ingon: "Kana si Pacquiao dili gyud ko ana niya mobotar sa election. Maglugos man gani og speak sa tagalog, unsa na lang kun adto sa kongreso. Bisag taga dire ra siya sa amoa, dili gyud mi boto nga mag-congressman siya."

Dugang pa ni Ms. Duerme:"Unsay pagtuo niya sa politika pakusganay og kumo. Maayo pa og sa boksing nalang niya i-focus iyang abilidad kay sa politika. Ambot lang, mangambot lang ko, ang moboto niya kato ra segurong walay grado same niya."

* * *

Dili na nako somadahon pa ang opinyon ni Ms. Duerme kay sama man katin-aw sa usa ka kristal ang iyang posisyon nga dili siya gusto sa pagpapili ni Pacquiao pagka-kongresista sa unang distrito sa South Cotabato sa eleksiyon karong Mayo 14.

Matud pa ni Voltaire (Francois-Marie Arouet, 1694-1778), usa ka notadong French philosopher, historian ug writer, "I may disagree with what you have to say, but I shall defend, to the death, your right to say it."

Basi niining panultihon, akong gi-respeto ang opinyon ni Ms. Duerme. Apan pasayloa ko nga dili ko mouyon sa iyang komentaryo nga walay grado si Pacquiao.

Bisan og wala siya makatiwas og elementarya tungod lagi sa ilang kakabus sa dihang bata pa siya, si Pacquiao nakapasar sa Accreditation and Equivalency Test (A&E) nga iyang gikuha sa Department of Education (DepEd). Laktod pagka sulti, si Pacman matawag na karon nga usa ka high school graduate ug kwalipikadong mokuha sa bisan unsang kurso sa kolehiyo.

* * *

Sigun sa panglantaw sa iyang mga kritiko, walay mahimo si Pacquiao kun ugaling mapili kini isip usa ka kongresista. Alang sa uban, boksing lang ang nahibaw-an ni Pacman ug dili siya angayan nga masud sa kongreso. Alang kanila, si Pacquiao walay pormal nga edukasyon mao ning wala kini alamag paghulma og balaodnon nga maoy labing mahinungdanong trabaho sa usa ka kongresista.

Apan akong ipaambit sa kadaghanan nga bisan ang labing banggiitan pang senador o kongresista nga anaa karon sa puwesto, nagsalig sa iyang mga staff ug pundok sa batid niyang mga adviser aron siya makapanday og usa ka balaod nga tukma sa iyang baroganan ug panghunahuna.



Og kon ugaling modaog si Pacquiao, dili ko motuo nga wala siya''y mahimo nga kaayohan sa kongreso. Kun mabutang na unya sa puwesto, si Pacquiao puwede maka-hire og pipila ka mga abogado ug consultants nga maoy pug-an niya og maayong ideya aron mobuhat og balaod nga kapahimuslan sa iyang mga ginsakupan.

Ang labing unang problema nga akong nasigpatan sa unahan kun ugaling makongresista si Pacman mao nga basin pulos mga buaya ug oportunista ang makuha niyang mga advisers. Kuyaw kun kini mahitabo.

* * *

Sa personal nakong opinyon, supak ko sa pagdagan ni Pacquiao niining puntoha gumikan kay humot, init ug sikat pa man kaayo siya sa kalibutan sa boksing diin ang paghakot og minilyon ka dolyares sayon ra kaayo alang niya.

* * *

Alang sa inyong mga reaksiyon, mahimong moemail sa mannix_80@yahoo.com