Ang pagpunting sa bola

Aron ikapahigayon ang masangpoton nga pagtira, kinahanglan nga maestablisar sa magdudula ang hustong pagpunting sa bola. Ang tako kinahanglan nga husto ang tumbok ngadto sa bolamano aron ang bolamano makaigo usab sa hustong ig-anan sa object ball. Usa kini ka praktikal nga pamaagi apan maoy tinuod ug mas epektibo.

Ang librong Snooker and Billiards nagkanayon: "If the cue ball and object ball are in a direct line with the pocket, it is simply a matter of striking the object ball full face. This shot cruelly exposes flaws in basic technique, and is therefore the natural place to start."

* * *

Klaro kining maong pamahayag. Dili na gani mistil pang pun-an. Dili na pud seguro kinahanglan pang ipasabot tungod kay tataw man kaayo ang pagpasabot sa awtor sa iyang mga teyoriya. Ang buot ipasabot sa pag-igo sa object ball nga "full face" mao nga ig-on kini sa kinatung-an gayod sa ig-anan niini. Kinahanglang dili mopingis bisan diyutay aron maseguro ang pagpasulod niini ngadto sa pocket.

Sumala sa mga eksperto, dili daghan ang matumbok nga hinungdan sa sipyat nga tayada. Sa praktikal nga aspeto, duha lang ang maisip nga hinungdan sa sipyat. "Either you sighted wrongly or struck the cue ball wrongly," sumala pa sa librong Snooker and Billiards. Kini maoy tinuod ug dili matuis ang maong kamatuoran.

* * *

Kun sayop ang pagkapunting sa bola, dili ka gayod makapaabot nga masulod kini sa pocket. Mosipyat pa man gani usahay kun husto ang pagkapunting, kana pa kahang nasayop nga puntariya maoy dili? Mao nga usa gayod sa mga hinungdan sa kapakyas sa pagpasulod sa bola (object ball) ngadto sa pocket mao ang sayop nga pagpunting niini atol sa pagpanako kanus-a sutaon sa magdudula ang iyang target.

* * *

Laing hinungdan sa sipyat mao ang sayop nga pagtira sa bola. Mahitabo kini sa duha ka paagi. Usahay, ang sayop nga pagtira maoy resulta sa sayop nga pagpunting. Apan may mga higayon sab nga bisan husto ang pagpunting, masayop ang pagtira tungod kay nausab ang target gumikan sa involuntary nga lihok sa lawas. Kining maong mga aspeto angay gayod bantayan sa magdudula.

* * *

(Mga sugyot ug pakisayod? Text sa 0910-8105522)