Kwarta Padala mipukan sa Arthro

Si Stephen Padilla mipasud sa iyang itsada sa nahabiling 1.4 segundo sa duwa aron pagtuboy sa M. Lhuillier Kwarta Padala-Cebu City ngadto sa kadaugan batok sa Arthro Kontra Arthritis, 94-93, sa exhibition game sa duha ka higanteng mga koponan sa Mindanao Visayas Basketball Association (MVBA) niadtong Martes sa gabii didto sa Buanoy Sports Center sa Balamban, Cebu.

Ang gikahadlokang sharp-shooter nga si Padilla nakalusot gikan sa hugot nga depensa ni Luther Luke Justiniani aron paglansang sa maong puntos nga nagkompleto sa mainit nga pagratsada sa M. Lhuillier human kini ma-alkanse og 13 puntos, 67-80 pagsugod sa katapusang kuwarter.

Sa sayo pa, si Rino Berame nakapuntos gikan sa undergoal aron pagpalabaw sa Arthro ni Jonathan ''Atan'' Guardo sa katapusang higayon, 93-92.

Daku sab og natabang sa kadaugan sa M. Lhuillier mao sila si Jett Latonio ug Mike Manigo nga mipasud sa crucial kaayo nilang mga itsada nga maoy nakapabuhi sa dugo sa Jewelers.

Ang maong duwa gipasiugdahan ni MVBA Vice Chairman Joe Soberano sa Cebu Landmaster kabahin sa tinuig nga kapistahan sa Balamban.

Si Padilla mikulit og 10 sa iyang 22 puntos sa katapusang kuwarter, samtang sila si Latonio, Ariel Mepana ug Alano Caputolan miamot og 13 puntos matag usa. Samtang si Berame maoy nangulo sa Arthro bitbit ang 17 puntos

Mga iskor

M. Lhuillier (94) - Padilla 22, Mepana 13, Caputolan 13, Latonio 13, Manigo 6, Aying 6, Enriquez 5, Limbo 5, Ramirez 5, Mercader 4, Ocanada 2

Arthro (93) - Berame 17, Cainglet 15, Luga 14, Abelong 12, Diputado 8, Gabas 7, Abellanosa 5, Ursal 3, Gadiane 3, Mercado 2, Santos 2, Justiniani 2, Redulosa 2, Garcia 1