Mismatch

Karong adlawa, seguradong mahiusa na sab ang tibuok nasudnong Pilipinhon. Kini aron pag-abiba ni Manny Pacquiao sa pagdepensa niini sa iyang WBC International super featherweight title batok sa Meksikanong si Jorge Solis didto sa Alamodome sa San Antonio, Texas.

Si Pacman nagbitbit og record nga 43-3-2 (34KOs), samtang si Solis wala pay pilde sa 32 ka away diin 23 sa iyang biktima iyang gipangtumba sukad siya nahimong pro niadtong tuig 1998.

Apan wala ko mobilib sa record ni Solis gumikan kay laktod pagka sulti, wala kaayo siya mailhi. Dili dekalibre ang iyang mga gipangpilde. Wala pa siya makakulit og daog batok sa bisan usa na lang ka sikat nga kontra nga angayan niyang ikapasigarbo sama ni Pacquiao nga mitumba sa pipila na ka inilang Meksikano sama nilang Marco Antonio Barrera, Erik Morales, Hector Valasquez ug Oscar Larios.

Gani si Golden Boy Promotions vice president Eric Gomez nagkanayon nga bisan barbero didto sa Mexico wala makaila kun kinsa kini si Solis. Kun ato kining panaminan, ang impresibong record ni Solis wala magrepresenta sa tinuoray nga kalibre sa iyang inawayan. Kun wala pa siya hulbota ni Top Rank big boss Bob Arum aron iparang ni Pacman, wala gyud unta kita mahibalo nga aduna diay boksidor nga nagngan og Jorge Solis.

* * *

Sa nahauna na nakong lindog, ako nang nahisgutan nga lagmit himuon lamang nga punching bag ni Pacquiao si Solis. Usa ka dakung mismatch ang maong engkuwentro kay mao pa lamang kini ang labing unang higayon nga si Solis makasangka og usa ka high-profile fighter.

Ang nakapait kay si Pacquiao, ang giyukbo-an nga pound-for-pound king karon sa kalibutan sa boksing mao dayon ang iyang banggaon. Mahug nga mora''g giparok ni Solis ang kaugalingon niyang ulo sa usa ka pader.

Apan tungod sa halapad nga kasinatian ug dakung makinarya ni Arum pagpadagan og usa ka boxing promotion, hayan nga impresibo kaayo ang pag-promote niini sa iyang "Blaze of Glory" triple championship card.

Maayo pud seguro ang pagkatudlo ni Solis kay sa iyang mga deklarasyon, wala kini mipakita bisan og gamay''ng kahadlok ug mibahad pa gani kini nga aduna siya''y igong kusog aron paludhon si Pacman sa iyang atubangan. Isog kaayong tan-awon si Solis, apan wala ba kahay ilaga nga nagdagan-dagan sa iyang dughan?

* * *

Si Solis mas taas og tulo ka pulgada ni Pacquiao. Gitan-aw sa uban nga mga ungo og boksing nga pabor kini alang ni Solis. Apan para nako, si Pacquiao maoy mabulahan niini. Kini kay kun si Solis mopahimus sa iyang "reach advantage," alang lamang kini sa iyang kadautan. Dili kini mosaler gumikan kay si Pacquiao ang tipo sa boksidor nga walay kahadlok moasdang sa iyang kontra.

Haum kaayo ang estilo ni Solis sa abilidad ni Pacquiao. Bugtong huna-hunaon ug hatagan og pagtagad ni Solis karon sa ilang away kun unsaon pagdepensa ang mga kumo ni Pacman.

Si Pacquiao mas kusgan, mas abtik ug mas lig-on batok ni Solis. Puwera na lang sa gitawag natong "upset" nga kanunay mo-igo mora''g usa ka kilat sa bisan unsang matang sa paugnat sa kusog, wa koy nakita nga anggulo nga si Pacman mapilde sa Meksikano. Og subli-on nako ang giluwatan nakong prediksyon, si Pacquiao mo-knockout ni Solis sud sa unom ka hugna.