Pag-aagawan nina Viloria at Mexican Edgar Sosa ang nabakanteng World Boxing Council (WBC) light flyweight crown bilang undercard sa international super featherweight title defense ni Pacquiao kay Mexican Jorge Solis sa Linggo sa Alamodome sa San Antonio, Texas.
Ang WBC light flyweight belt ang siyang lehitimong korona kumpara sa suot ngayong WBC International super featherweight crown ng 28-anyos na si Pacquiao.
Kaya naman pursigido ang tubong Ilocos Sur na si Viloria na mabawi ang nawala sa kanyang WBC light flyweight title, inagaw ni Mexican Omar Niño noong Agosto ng 2005.
"I am going to take back what is rightfully mine -- the world title," pangako ng 5-foot-4 na si Viloria, nagdadala ng 19-1-1 win-loss-draw ring record kasama ang 12 knockouts, samantalang ibinabandera naman ni Sosa ang 26-5 (14 KOs).
Binawian ng WBC si Niño ng korona matapos mapatunayang gumamit ito ng amphethamine, isang banned substance, sa kanilang rematch ni Viloria noong Nobyembre ng 2006 na siya niyang ipinanalo via unanimous decision. (Russell cadayona)