ML Kwarta Padala Indoor Volleyball tourney gitakda

Andam na ang tanan alang sa pagpahigayon sa M. Lhuillier Kwarta Padala Indoor Volleyball Tournament alang sa lalaki ug babaye karong Abril 28 diha sa University of San Carlos (USC) main gym.

Niabot og 16 ka mga koponan ug gibahin sa duha ka dibisyon ang mopakita''g aksiyon ning duha ka buwan nga torneyo nga gitukod sa M. Lhuillier Sports Development Foundation (MLSDF) pinaagi sa paningkamot sa ilang kugihang executive director Eddie B. Ybañez.

Ang entries sa matag kategoriya bahinon ngadto sa duha ka brackets segun sa nasabotan sa mga representante sa matag partisipanteng koponan atol sa organizational meeting nga gipangulohan ni Ybañez sa miaging gabii diha sa White Gold House Restaurant.

Sa men’s group, ang nag-unang duha ka team sa Bracket-A mao ang University of San Carlos (USC) ug University of the Visayas (UV), samtang sa Bracket-B mao ang University of San Jose-Recoletos (USJ-R) ug University of Southern Philippines-Foundation (USP-F).

Sa pikas bahin, nag-una sa Bracket-A mao ang USJ-R ug USC, samtang ang USP-F ug Southwestern University (SWU) maoy nag-uban sa Bracket-B.

Ang rankings gibasi sa school’s standings sa miaging Cebu Schools Athletic Foundation, Inc. (CESAFI) season.

Ang nahabilin sa men’s category gilangkuban sa University of Cebu (UC), Carcar ug Lilo-an selections. Ang katapusang entry mao ang Mandaue selection-Cebu Institute of Technology (CIT).

Samtang sa women’s class nikompleto ang UC, Hiroshi All-Stars ug ang MLSDF selection. Ang Carcar ug Bulacao maoy nikompleto sa ikawalo.

Ang maong kompetisyon mosubay og single round robin format sa duha ka dibisyon.

Ang nag-unang duha ka teams sa matag bracket mo-abante sa crossover semifinals diin ang Bracket A topseed moharong sa no. 2 Bracket B ug ang no. 1 sa Bracket moharong sa no. 2 sa Bracket A alang sa tinaktakay nga duwa. Ang modaog maoy mag-abot sa kampiyonato.