Ang sentimiyento ni Leonardo ST

Duna koy nadawat nga text gikan sa usa ka Leonardo Segundino T nga taga Talisay City pero mihangyo nga dili lang ibutyag ang iyang cellphone number. "For security reason" kuno, niya pa. Okey lang.

Ang iyang text nagkanayon: "Usa ako ka fan reader sa imong column Magbilyar Ta. Disappointed lang ko usahay kay inigsusi nako sa page 15 wala man ang imong lindog. Dili baya kay ako ray nag-follow ani. Ang akong sentimiyento mao ang bahin sa kakulang sa pagpakabana sa kadaghanan kun unsaon pagpalambo ang game of billiards dinhi sa Pilipinas. Unsaon nato pag-encourage sa younger set kun wa tay ikapakitang proof nga may kaugmaon sila sa pagdula og bilyar. Dinhi na lang ko kutob. Daghang salamat sa imong pagtagad." -- 0920-5948xxx

* * *

Daghang salamat sa imong text. Pasensiya ka na nga usahay dili makagawas ang atong lindog. Tungod kini sa kaapiki sa espasyo. Hinuon, akong paningkamotan nga makapadayon kining maong lindog sa pag-alagad sa mga magbabasa nga nahimo nang suki niini. Salamat sab sa inyong suporta.

Makasimpatiya ko sa imong sentiyimento, LST. Tinuod ang tanan nimong gibatbat sa imong text. Maglisod gyud ta sa pagdasig sa mga batan-on sa pag-pursue sa ilang hilig sa billiard sport kun wala kitay ikapakitang garantiya nga mahayag ang ilang kaugmaon kun ilang palamboon ang ilang abilidad sa maong disiplina.

* * *

Hinaut unta nga ang akong pangaliya ug ang imoha managsama. Nga magakadaghan unta ang mga negosyante ug mga opisyal sa atong kagamhanan nga makabaton og interes sa pagsuporta sa billiard sport pinaagi sa pag-sponsor og mga billiard tournament. Pinaagi niini, nakaseguro ko nga daghan ang madasig sa pagdula og billiard. Kinahanglan nga atong ipakita nga "may kuwarta" sa pagdula og bilyar aron daghan ang madasig sa pagbakyaw sa ilang tako.

* * *

Malipayon ug malingawong pagbasa sa Magbilyar Ta ngadto ni Pat Salingay, driver sa Dinurog Transit sa Bohol. Si Pat usa sa kanunay nagsunod og basa niining lindog diha sa Integrated Bus Terminal sa Dao, Tagbilaran City.

* * *

(Mga sugyot ug pakisayod? Text sa 0910-8105522)