Arthro nakaangkon talagsaong kadaugan

Ang Arthro Kontra Arthritis nakaangkon og talagsaong kadaugan sa ilang pakigsangka batok sa Beverly Farms sa iskor nga 72-70 sa nagpadayong aksiyon sa Labangon Sports Commission (LSC)-organized open basketball tournament niadtong Domingo diha sa Labangon Sports Complex.

Ang mga bituon sa collegiate nga sila si Michael Luga ug Morsie Akad gikan sa University of the Visayas (UV) Green Lancers niposa og 17 puntos matag usa, samtang si Leodi Garcia nitampo og 10 puntos alang sa Arthro, nga gibuligan og maayong tempo sa maong engkwentro gikan nakahunat og 20-12 human sa unang kuwarter.

Ang Arthro nakabentaha og nuybe human sa tulo ka kuwarter, 59-50, apan ang Beverly Farms nakabangon human sa ilang mainiton nga rally sa naghinapos nga bahin sa duwa.

Bisan pa sa gihimong rally sa Beverly Farms, wala gihapon matarog ang Arthro ug padayon kining nakigbisog hangtod nga naangkon ang ilang gitinguha nga kadaugan.

Sila si Alex Cainglet ug Vergel Abelong miamot og otso puntos matag usa alang sa Arthro, samtang sila si Chris Diputado ug Rino Berame nagkumboya og 12 puntos.

Sila si Mark Abadia ug Jessie Lumantas maoy nangulo sa pilderong Beverly Farms nga miani og 21 puntos matag usa.