Adios, Commissioner Jun

Human nagpalaban sa korte aron makakuha og preliminary injunction sa tuyo nga hunongon ang away ni Manny Pacquiao batok sa Meksikanong si Jorge Solis karong Abril 14 didto sa San Antonio, Texas, nagduda na hinuon ko sa tinuoray nga interes sa Golden Boy Promotions sa career ni Pacman.

Sa nahauna nilang pamahayag, ang Golden Boy nagkanayon nga kaayohan ni Pacquiao maoy ilang giprotektahan busa dili nila itugot nga maadto kini sa laing mga kamot.

Nahibaw na ang tanan nga padayon pa karong gihusay sa korte ang kaso tali sa Golden Boy Promotions ni Oscar de la Hoya ug sa Top Rank ni Bob Arum kun si kinsa gayod kanila ang maka-angkon katungod nga mo-promote sa umaabot nga mga away ni Pacquiao.

Si Pacquiao sa personal niyang desisyon, mipili ni Arum maoy iyang promoter mao nga ang Top Rank maoy naghikay sa umaabot niyang away batok ni Solis nga maoy main event sa "Blaze of Glory" card didto sa Aladome.

Ang Golden Boy misuway og hunong sa maong promosyon, apan pakyas kini human gibasura sa korte didto sa Las Vegas ang ilang petisyon. Ang gihimo sa Golden Boy posibleng makaguba sa career ni Pacquiao kun gipaboran pa kini sa korte. Mao ning nagduda ko sa motibo karon sa Golden Boy.

Kun nagpakabana pa ang Golden Boy sa career ni Pacman, ila unta unang gihuwat ang desisyon sa korte kun kinsay paboran niini isip legal nga promoter ni Pacquiao. Wa'a unta sila mohimo og lakang nga makadaut sa career ni Pacman.

* * *

Taliwala sa labing mabungahon nga panahon sa iyang career sa bilyar, usa ka unos ang mihampak sa kinabuhi ni Ronnie Alcano. Si Alcano kasamtangang naghari isip world 8-ball ug 9-ball champion, apan ang sanag niyang career kalit nga nabulitan og bagang dag-om human ang 14-anyos niyang anak nga babaye mipasangil nga gi-molestiya siya sa kaugalingon niyang amahan.

Dili ko mag-una-una og hukom sa anak ni Alcano apan para nako kuwestiyonable ang iyang pasangil. Istorya lamang ug wala siya konkretong ebidensiya nga makapamtuod sa iyang akusasyon. Og ngano gud intawon nga karon lang siya motumaw nga sa panahon nga nakatilaw og grabeng kasikat ug nakahakot og kinaban nga bahandi sa bilyar ang iyang amahan.

Sa dihang mikabkab siya og US$100,000 kon dul-an sa P5 milyones sa pagdominar niya sa 2006 World Pool Championships, si Alcano nagkanayon nga iyang gihatagan og P100,000 ang iyang anak aron maka-open og account sa Banco de Oro. Apan unsay gihimo sa iyang anak, inay nga magtigum giwaldas hinuon ang kuwarta nga iyang gipasingotan og dugo sud lamang sa pipila ka adlaw.

Karon kalit nga mitumaw ang iyang anak ug mipasaka og kasong "child molestation" batok kaniya. Lumo kaayo og nawong si Alcano nga mihimakak sa maong pasangil. Ang nakapait kay kaugalingon niyang anak maoy miunay og hokhok kaniya.

* * *

Nakugang ko sa dihang nasayod sa balita nga mipanaw na sa laing kalibutan si kanhi PBA commissioner Emilio 'Jun' Bernardino Jr. Dili ko makatuo sa kalit sa hitabo gumikan kay lagsik pa man si Commissioner Jun sa dihang ako siyang nahimamat atol sa Unity Congress nga gipasiugdahan sa Samahang Basketbol ng Pilipinas (SBP) sa miaging bulan didto sa Dusit Hotel Nikko sa Makati.

Gani bibo pa kaayo si Commissioner Jun nga nagtuyok-tuyok matag lamesa aron makiglamano sa mga delegado nga mitambong sa maong kongreso.

Si Commissioner Jun daghan og natabang alang sa kaayohan sa Philippine basketball. Sa iyang termino, ang PBA nakaangkon og grabeng kalampusan ilabi na sa pagsikit niini sa dughan sa ilang mga fans sa nagkadaiyang probinsiya sa nasud.

Sa iya sab nga panahon isip PBA Commissioner, nahimugso ang PBA Press Corps dinhi sa Sugbu. Bisan og ila kining gihimo isip tubag sa grabeng popularidad sa MBA niadtong panahona, ang maong lakang ni Bernardino gihangop ug gikapasigarbo kaayo sa mga miyembro sa Cebu sportswriters.

Apan niadtong Sabado sa kaadlawon, si Commissioner Jun mipanaw sa edad nga 59 gumikan sa sakit sa kasingkasing. Bisan og wala na siya, ato sa kanunay mahandum ang mga maanindot niyang nahimo sa Philippines basketball. Adios kanimo Commissioner Jun, may you rest in peace under the loving arms of our Lord.

* * *

Alang sa inyong mga reaksiyon, mahimong mo-email sa [email protected]