Ang bugtong kumbati sugdan sa alas 5:00 sa hapon.
Ang CDO Burger nga gibitoonan sa UV Green Lancers nakatilaw og pilde batok sa VFI-Jaguars sa elimination round sa iskor nga 72-77. Ang maong kapildihan maoy nagtukmod sa CDO Burger-UV ngadto sa ikatulo nga dapit paghuman sa classification round.
Apan dili angayan nga kompiyansaan ang CDO Burger-UV gumikan kay ila man nga gilubong ang second-ranked Metro Gaisano-University of Cebu (UC) Webmasters sa semifinals aron paghawan sa ilang dalan paingon sa ganghaan sa himaya.
Si Jaguars' head coach Edito Salacut, kinsa bag-o lang misakmit sa unang titulo sa Visayas Amateur Athletic Association (VAAA), miingon nga ang CDO Burger-UV usa ka solidong team ug maoy bugtong team nga lisud puhagon.
Sama sa naandan ang VFI-USJR magsandig sa ilang pambato nga si Armand Ponce, Lyndon Gudez ug Luther Justiniani.
Dili sab magpalupig ang CDO Burger-UV ug itugyan sab ni coach Elmer 'Boy' Cabahug ang iyang pagsalig ngadto nilang Rino Berami, Eduardo Arda, Bomber Sendrijas ug Mark Anthony Manigque.
Ang dakung pangutana kun makapugong ba ang VFI-USJR ni Berame sa shaded lane.
Lain bantayanan sa VFI-USJR mao silang Von Harry Lanete, Chris Diputado, Ritchum Dennison ,Franfgel Omolon, Jaysar Esperat, Morsie Akad.
Sa laing bahin, ang sudden-death alang sa ikatulong dapit tali sa Metro Gaisano-UC ug Skygo-SWU Cobras duwaon ugma didto sa multi-million Danao City Sports and Civic Center.