Pagka inutil

Bisan usahay og sakit sa atong dughan, kitang tanan makadawat og kapildihan. Apan para nako, istupido ang tulo ka judges sa ilang pamaagi pag-iskor sa away tali nilang Gerry Peñalosa ug sa Meksikanong kampiyon nga si Daniel Ponce de Leon alang sa WBO super bantamweight title niadtong Domingo didto sa Mandalay Bay sa Las Vegas.

Tiaw mo, si Dave Moretti mitali og 120-108 pabor ni De Leon. Laktod pagkasulti, way nadag-an nga round si Gerry? Pagka-inutil. Utro pod ni silang Chuck Giampa ug Nelson Vasquez nga parehong mi-iskor og 119-111 alang sa Meksikano. Pulos buta ang duha kay usa ra man sud sa 12 ka hugna ang ilang nakit-an nga nakabentaha si Gerry batok ni De Leon.

Pahinumduman ko kamo nga si Giampa usa sa mga mitulis ni Z Gorres og kadaogan sa pag-iskor niini og 114-112 pabor ni Fernando Montiel nga maoy nakatabang sa Meksikano pagpabilin sa iyang trono isip WBO super flyweight champion niadtong Pebrero 24 diha sa Cebu City Sports Center.

* * *

Basi sa statistics, 1,399 ka mga kumo ang nabuhi-an ni de Leon, samtang si Gerry mibuhi lang og 481 ka mga suntok. Apan dili kini igong sukaranan sa tulo ka judges paglampaso nila ni Gerry sa ilang mga scorecards.

Unsa man diay ning boksing, padaghanay og kumo? Pananglit kuno bi og makakita ka'g sinukmagay, ang imong kontra daghang gibuhian og kumo apan gamay ra og igo, ug ikaw nga gamay ra og gibuhian nga kumo apan daghan og igo, kinsa man ang mabun-og?

* * *

Mao kini ang gibuhat ni Gerry ngadtong de Leon. Sigun sa CompuBox, si de Leon mibuhi og 1,399 ka kumo apan 259 lamang niini ang nalandig kun 19 porsiyento. Si Gerry nibuhi og 481 ka suntok apan nakaigo kini og 175 kun 36 porsiyento.

Sa jabs, 596 ang kang de Leon apan igo lang kini nakaigo og 46 kun otso porsiyento. Si Gerry adunay 134 ka jabs apan 43 niini ang miigo ngadto ni de Leon kun 32 porsiyento.

Gilampurnas sab ni Gerry si de Leon kon power punches maoy hisgutan. Si de Leon nakalabay og 803 ka power punches apan 213 ra ang nalandig niini, samtang si Gerry nakalabay lamang og 347 apan 132 ang iyang napatugpa ngadto de Leon kun 38 porsiyento.

* * *

Basi sa maong mga numero, dili ko makatuo nga silang Moretti, Giampa ug Vasquez maka-iskor og ingon ato. Sa lintunganay nga pagka sulti, kaduha nila gipatay si Gerry. Nakakita man gyud ko sa maong away, para nako posible pa gani nga modaog si Gerry. Unsaon ta man kay sagad sa mga langyaw nga boxing judges karon mikroskopyo na man maoy kinahanglan aron makatarong og judge sa usa ka away.

* * *

Alang sa inyong mga reaksiyon, mahimong mo-email sa mannix_80@yahoo.com