USJ-R nakabentaha

Ang University of San Jose Recoletos (USJR) Jaguars maoy unang nakabentaha sa serye human sa ilang kadaugan batok sa Southwestern University (SWU) Cobras, 67-59 sa "best-of-three" final series sa Visayas Amateur Athletic Association (VAAA) sa miaging gabii diha sa USC gym.

Wala kapugngi sa Cobras ang kabangis sa haring gangis nga si Lyndon Gudez, kinsa maoy gihimong hinagiban sa Jaguars pagkutlo og daog. Si Gudez milansang og 17 puntos diin ang iyang katapusang singko puntos maoy nagtunol og dos puntos nga bentaha sa Jaguars, 57-55. Nainat pa kini ngadto sa singko puntos, 60-55 sa nahabiling 4:12 sa duwa.

Ang duha ka free throws ni Armand Ponce maoy miselyado sa kadaugan sa Jaguars

Si Clifford Maguate wala kaayo makaarte tungod sa kahigpit sa depensa sa Jaguars ug igo lang kini mikulit og kuwatro puntos, samtang si Alfred Belande igo lang sab miposte og singko puntos .

Bugtong si Chris Litorja ang nakapakita og maayong labok sa Cobras pinaagi sa pagpabuhagay og 18 puntos, gisundan kini ni Ritchie Jalandoni nga adunay 10 puntos.

Sa laing bahin, ang University of San Carlos (USC) Warriors maoy niangkon sa ikatulong dapit pinaagi sa pagposte og 97-83 nga kadaugan batok sa Salazar Institute of Technology-Salazar College (SIT-SC) Skyblazers.