Cebu Niños manalipod na sa korona

Andam na ang Cebu City Niños sa pagpanalipod sa ilang ika-14 nga overall championship title sa Central Visayas Regional Athletic Association (CVIRAA) meet dihang pormal na nga sugdan karong adlawa ang kumbati didto sa nagkalain-laing binyu sa Oriental Negros.

Apan ang dakung pangutana kun makapadayon ba ang Cebu Niños sa ilang impresibo nga performance nga wala na ang leadership ni Dr. Leonilo Oliva, kinsa nabalhin sa Lapu-Lapu City Division ug ingon man ni PESS supervisor Matilde Mayonila, kinsa gi-promote sa DepEd RO VII regional office.

Ang Cebu City Niños nga ubos na karon sa kamandoan ni PESS supervisor Neneth Pardenilla, mabalhiboan na karon sa hosts Negros Oriental ug Dumaguete City, nga maoy lig-ong kaatbang sa swimming event ug sa track and field giant Cebu Province ug Bohol.

Karong adlawa, adunay gitagana nga 28 ka bulawang medalya sa elementary ug secondary swimming events ug lain pang 14 ka athletics.

Ang Cebu City Niños gitakdang magsugod sa pagpanalipod sa ilang titulo sa elementary football batok sa modaog tali sa Mandaue ug Lapu-Lapu, samtang ang secondary squad moharong sa modaog tali sa Bohol ug Bais.

Sa basketball, ang Cebu Niños moharong sa Bais o dili ba sa Lapu-Lapu, samtang sa ang elementary bets mopakita sa ilang aksiyon sa labing unang higayon batok sa Tagbilaran.

Sa baseball, ang batan-ong Cebu Niños mokigtabo sa Dumaguete, samtang ang secondary squad makigtigi sa Bohol o dili ba sa Tanjay. Ang Dumaguete o ang Lapu-Lapu maoy unang masangka sa Cebu Niños sa duwang softball, samtang sa sipa moduwa kini sa modaog sa duwa tali sa Tagbilaran ug Bais.