VAAA finals banatan karon

Panimalos maoy nagpasulabi sa huna-huna sa Southwestern University (SWU) Cobras sa ilang pakigharong sa University of San Jose-Recoletos (USJ-R) Jaguars sa Game-1 sa "best-of-three" Visayas Amateur Athletic Association (VAAA) men's basketball finals karong adlawa diha sa USC main gym.

Ang Jaguars ug Cobras pulos mipatikangkang sa tagsa-tagsa nila ka kaatbang -- ang Salazar Institute of Science and Technology (SCSIT) ug University of San Carlos (USC) Warriors aron paghansay sa "besf-of-three" championship showdown.

Ang Jaguars maoy nakakuha og dakung pabor tungod kay sa lima nila ka duwa, lakip na niini ang Partner's Cup, sila kanunay ang modominar sa Cobras.

Ang Jaguars magsandig sa ilang mga haligi sama nila ni Armand Ponce ug Lyndon Gudez nga maoy mogiya sa opensa uban sa abag nilang Luther Justiniani, John Malinao, Randy Pogoy, Manny Gabas, Boby Hatague ug Jessmar Villahermosa.

Samtang ang Cobras, magsandig sab sa abilidad nilang Alfred Belande, Mariano Canonigo, Richard Gianchand, Clifford Maguate ug Ritchie Jalandoni.

Sa pasiunang duwa, magsangka ang USC ug SCSIT alang sa ikatulo nga dapit nga gitakda sa alas-5:00 sa hapon.