CDO Burger-UV nipaso na's finals

Nipaso sa ganghaan sa himaya ang CDO Burger-University of the Visayas (UV) Green Lancers human sa ilang kadaugan pinaagi sa paglubong sa Metro Gaisano-University of Cebu (UC) Webmasters, 113-88 sa Game-2 sa ilang "best-of-three" semifinal round sa CESAFI-Partner’s Cup kagabii diha sa Cebu Coliseum.

Sa pikas bahin, ang Skygo-Southwestern University (SWU) Cobras nakalingkawas gikan sa mga kamot sa topseed VFI-University of San Jose-Recoletos, 79-76 sa kaugalingon nilang "best-of-three" semis aron pagpugos og tinaktakay nga duwa.

Ang CDO Burger-UV milubong sa Metro Gaisano-UC sa Game-1 sa iskor nga 104-81 dihang nag-wild si Rino Berame. Si Berami niani og 19 puntos sa maong kadaugan.

Laing pito ka magduduwa sa CDO Burger-UV ang mikulit og double digits, samtang tulo lang ka magduduwa sa Metro Gaisano-UC ang nikulit og double figures kortesiya nilang Allain Abellanosa (23 puntos), Jonathan Canceran (21 puntos) ug Jared Kane Abatayo (13 puntos).

Sa maong kadaugan, ang CDO Burger-UV magpaabot na lang sa resulta sa duwa tali sa VFI-USJR ug Skygo-SWU alang sa "best-of-five" championship series nga gitakda sa sunod semana.