Gipalayas sa CDO Burger-UV Lancers ang El Rancho-Cebu Institute of Technology (CIT) Wildcats pinaagi sa pagpilde niini sa iskor nga 109-90, samtang ang fifth-seed Skygo/SWU Cobras mipakugang sa twice-to-beat Hapee-University of San Carlos (USC) Warriors, 85-73 aron paglikay sa sayong pagbakasyon.
Gumikan sa ilang kadaugan, ang CDO Burger-UV nakig-uban na karon sa Virginia Food Inc. (VFI)-backed University of San Jose-Recoletos (USJ-R) Jaguars ug Metro Gaisano-University of Cebu (UC) Webmasters sa sunod nga hugna, samtang ang Skygo-SWU nakapuwersa og tinagakay nga duwa batok sa Hapee-USC diin ang modaog maoy mokompleto sa four-team semifinal cast. Ang Skygo-SWU ug Hapee-USC magsangka sa gipaabot nga kulbahinam nga duwa karong alas 6:15 sa gabii, human ang reigning CESAFI secondary champion UC Junior Webmasters nga makigharong batok sa bag-o lang gikoronahang LIGA Cup champion USC-North sa usa ka exhibition match sa alas 4:30 sa hapon.
Karon nga nakaangkon og laing tsansa ang SWU-Skygo, seguradong ang presyur anaa sa abaga sa Hapee-USC, ilabi na kay dili makaduwa ang usa sa mga sinaligan niini nga si Jomel Igao sa mahinungdanong duwa karon.
Si Igao gipahamtangan og usa ka duwa nga suspensiyon human siya ma-ejected gumikan sa paglukapa niini ni Joseph Escober sa SWU human kini niya gisiko sa nahabiling 4:36 sa ilang duwa.
Si Jaime Yap mipasud og usa ka free throw ug dayon si Mariano Canonigo mipasud sa iyang itsada aron sa pagpa-abante sa Skygo-SWU og 12 puntos, 75-63, sa nahabilin nga 3:50 sa duwa. Sukad niadto, wala na milingi pa ang Skygo-SWU.
Si Clifford Maguate maoy nangulo sa Skygo-SWU bitbit ang 21 puntos, samtang si Belande midugang og 19 puntos.
Sa laing bahin, si Harlow Chad Villanil mao sab ang nangulo sa CDO Burger-UV nga milansang og 23 puntos, samtang sila si Rino Berame ug Frangel Omolon miamot og 13 puntos matag usa.