VFI-USJR abante sa semis

Ang topseed nga VFI-USJ-R Jaguars ug ang second-seeded Metro Gaisano-UC mi-abante na sa semifinals human nila gipukan ang ilang tagsa-tagsa ka kaatbang sa nagkainit nga aksiyon sa Partner's Cup kagahapon diha sa Cebu Coliseum.

Ang VFI-USJR milubong sa undermanned nga Cebu Landmaster-USP-F Panthers sa iskor nga 85-62 aron sa pagpahiluna sa unang dapit sa semifinals, samtang ang Metro Gaisano-UC Webmasters mipabuto og 19-0 run sa ikatulong kuwarter uban na niini ang duha ka "slam dunk" nga nakapahugyaw sa mga fans, mitumba sa Guardo-Don Bosco Greywolves sa iskor 105-95.

Isip no.1 team, ang VFI-USJR maoy makigsangka sa modaog sa duwa tali sa Hapee-USC Warriors ug Skygo-SWU Cobras, samtang ang second seed nga Gaisano-UC mag-agi og malisod nga tahas sanglit ang ilang ikasangka mao man ang CDO Hamburger-UV Lancers.

Init kaayong labok ang gipakita sa VFI-USJR ug gani mikandos gilayon kini og 11-0 sa pagsugod sa duwa ngadto na pagkulit og 42-20 paghuman sa nag-unang duha ka kuwarter.

Ang Cebu Landmasters-USP-F wala gyud makakita sa tiempo sa duwa ug padayon kining naghanduraw nga unta ilang makuha ang momentum bisan pa man sa kakulang sa ilang players.

Ang Cebu Landmasters-USP-F aduna lamang kini pito ka mga magduduwa nga nitunga.

Sila si Luther Justiniani ug Armand Ponce maoy nagdiktar sa momentum alang sa VFI-USJR nagkumboya og 25 puntos.

Si Justiniani nikati og 14 puntos ug si Ponce niabuno og 13 puntos. Nakakuha sab sila og maayong suporta gikan ni Lyndon Gudez, kinsa miani og 11 puntos.

Sa laing bahin, ang Gaisano Metro-UC grabe kaayong nakapakita sa ilang labok sa ikatulong kuwarter ug milusad kini og 19-0 run nga maoy nagtukmod kanila ngadto sa kalampusan batok sa Don Bosco, 62-58.