Alcano, kampeon sa World 8-Ball Championships

Pinatunayan ni dating AzBilliards Rookie of the Year Ronato "The Volcano" Alcano na siya pa din ang pinaka-aktibong bulkan sa buong mundo matapos dispatsahin ang kapwa Pinoy na si Dennis "Robocop" Orcollo, 11-8 sa katatapos na third annual World 8-Ball Championship noong Huwebes ng gabi sa Al Bashton Hall sa Fujairah, United Arab Emirates

Bagama’t mahina ang naging simula ni Alcano ay nagawa niyang maitabla ang laro sa 2 all ng manalo sa 4th frame.

Dahil sa natamong tagumpay, ibinulsa ni Alcano ang pangunahing premyong $25,000, habang ang runner-up na si Orcollo ay tumanggap ng $12,500. Nakadale naman ang losing semifinalist na si Joven Bustamante ng $6,250.

Bago makapasok sa finals, kinailangan munang idispatsa ni Orcollo ang overseas Filipino worker na si Bustamante 10-5 sa semifinal round para maipuwersa ang all-Filipino finals kay Alcano, na nanaig kay Niels Feijen, 10-4 ng Netherlands noong Miyerkules ng gabi.

Si Alcano, runner-up finish sa Korean 9-ball Open sa Incheon, Korea noong nakaraang buwan ay sinundan ang yapak at achievements ni Wu Chia-ching ng Chinese- Taipei na hinirang na 8-ball at 9-ball winner noong 2005.