Guardo, M. Lhuillier mag-abot sa Davao

Ang Arthro Kontra Arthritis-backed Atan Guardo ug ang M. Lhuillier Kwarta Padala-Cebu City Jewelers ang mag-abot pag-usab sa 2007 Araw ng Davao Invitational basketball tournament nga mosikad karong Domingo didto sa Almendras Gym sa Davao City.

Ang Atan Guardo-Heartvit, nipukan sa M. Lhuillier 84-83 aron pagsakmit sa titulo sa bag-o lang natapos nga 2007 Mindanao Visayas Basketball Association (MVBA) pre-season games diha sa Cebu Coliseum.

Seguradong magtakilid ang Atan Guardo ubos ni coach Al Solis gumikan kay dili na nila mahiuban silang Joseph Ronald Quiñahan, Reed Friar, Juntilla, Doroteo Almacin ug Ronald Bucao, kinsa nipasilong og balik sa ilang tagsa-tagsa ka mother teams sa Philippine Basketball League (PBL).

Ang upat maoy gihimong hinagiban sa Atan Guardo pagpukan sa M. Lhuiller Jewelers.

Hinuon, ang Atan Guardo mikuha sa serbisyo nilang Bernie Ursal, Ariel Lozano ug Kim Calo, nga maoy moabag nilang Rino Berame, Alex Cainglet, Jerome Gadiane, Michael Luga, Leodi Garcia, Marvin Mercado ug Morsie Akad.

Gawas sa Atan Guardo ug M. Lhuillier, laing teams nga mobanat sa unom ka adlaw nga kumbati mao ang host Davao Aguilas, Ozamiz Cotta, Montaña Pawnshop ug Holcim Pryce Pharma MisOr.

Ang gamhanang M. Lhuillier gilangkuban nilang Stephen Padilla, Mike Manigo, Woodrow Enriquez, Enrico Llanto, Niño Ramirez, Danny Aying, Alano Caputolan, Marlon Piodo, Aldrin Ocañada ug Ariel Mepaña.