El Rancho-CIT Wildcats naka-ikyas

Miposte sa ilang ikatulo ka sunod-sunod nga kadaugan ang El Rancho-Cebu Institute of Technology (CIT) Wildcats pinaagi sa pagpilde sa Guardo-Don Bosco Greywolves sa iskor nga 79-70 sa nagpadayong aksiyon sa CESAFI-Partner's Cup kagahapon diha sa Cebu Coliseum:

Bisan pa nabiyaan og otso puntos sa ikatulong kuwarter sa iskor nga 41-49, ang Wildcats nakahimo gihapon pagbangon pinaagi sa kombinasyon nilang Jerry Lumongsod, Marvin Abapo ug Emilio Aniñon Jr., nga nagkumboya og 42 puntos sa maong duwa.

Si Lumongsod mikandos og 17 puntos, gisundan ni Aniñon, kinsa mitimang og 13, samtang si Abapo miabuno og 12 puntos.

Gumikan sa maong kadaugan, ang El Rancho-CIT Wildcats nagtangag na og 3-4 win-loss record.

Silang Aniñon ug Lumongsod mao ang miwadwad og maayo hangtod na sa katapusang gutlo pinaagi sa ilang mga killer triples aron paglukso og balik human mabiya-i sa iskor nga 75-68 sa nahabiling 23 segundos sa maong kumbati.

Samtang ang pilderong Guardo-Don Bosco Greywolves nga wala makapahimulos sa serbiyo sa ilang sentro nga si Lester Sunga, gipangulohan ni Ian Calooy, kinsa nipupo og 17 puntos.

Ang Guardo-Don Bosco nagbitbi og 1-6 win-loss record diin ang ilang bugtong gibiktima mao ang Cebu Landmaster-University of Southern Philippines Foundation (USP-F) Panthers