Line-up sa Cebu City alang sa Arafura Games masayran ugma

Ang dakbayan sa Sugbu gipaabot nga mopahibalo ugma sa line up sa mga atleta kinsa maoy modala sa bandera sa Queen City of the South sa umaabot nga Arafura Games karong Mayo 12-19 didto sa Darwin City, Northern Australia.

Karong adlawa, si Commissioner Ambrosio de Luna sa Philippine Sports Commission (PSC) makigtagbo sa mga opisyales sa Cebu didto sa PSC office aron tukion ang mga isyu kabahin sa pagpangandam sa Arafura Games.

Si Cebu City Councilor Sylvan 'Jack' Jakosalem nagkanayon nga ang Cebu City Sports Commission (CCSC) nitugyan ngadto ni technical consultant, Dr. Danilo Villadolid sa paghagpat og mga banggiitang atleta nga maoy molangkob sa 20-man Cebu City delegation.

Si Jakosalem, sa iyang bahin wala pa makahibalo kun unsa nga events ang ipadala sa Sugbu, apan seguro gyud ang boxing usa sa mga prayoridad.





Si Villadolid nagkanayon nga ang boxers nga ilang kuhaon posibleng gikan sa stable ni Wackee Salud tungod kay ang mga boxers ni sports patron Antonio L. Aldeguer tua na man sa Greater Cebu Sports Organizing Committee ubos ni kanhi CCSC chairman Jonathan Guardo, kinsa naghulma sab og kaugalingon niyang team alang sa Arafura Games.

Mga events nga tigian sa Arafura Games mao ang athletics, badminton, basketball, boxing, cycling, football, golf, hockey, judo, netball, sailing, sepak takraw, shooting, squash, swimming, table tennis, tenpin bowling, triathlon, volleyball ug weightlifting.