CDO-Burger vs. El Rancho

Ang CDO Burger-University of the Visayas (UV) Green Lancers mopakita karon sa ilang abilidad batok sa El Rancho-Cebu Institute of Technology (CIT) Wildcats sa main game sa Partner's Cup diha sa Cebu Coliseum.

Sa laing bahin, ang VFI Corned Beef-University of San Jose-Recoletos (USJ-R) Jaguars niposte sa ilang unang daog human gipilde ang Cebu Landmasters-USP, 88-74 sa ilang kumbati niadtong miaging gabii diha sa Cebu Coliseum.

Ang VFI nipahimulos sa serbisyo sa ilang tulo ka key players nga pulos nakakuha og double figures. Si Bobby Hatague nibugha og 19 puntos, si Armand Ponce niamot og 17 puntos, samtang si Luther Justiniani nitampo og 16 puntos alang sa Jaguars.

Ang Panthers bisan og nakuha ni coach Raul Latonio ang duha ka rookies nga sila si Francis Dysam ug Raymond Olivar, wala gihapon magsilbe ang ilang kaisog tungod sa kabangis sa Jaguars.

Si Dysam igo lang nakakuha og 12 puntos, samtang si Olivar wala manimaho sa maong duwa.

Sila si Randy Colonia ug Bryan Travero maoy top scorers sa pilderong Panthers nga adunay 15 puntos matag-usa.