Sa pasiuna, ang two-weekend event gitakda untang mosikad karong Pebrero 10, apan ang organizers nga gipangulohan ni MLSDF executive director Eddie Ybañez ug M. Lhuillier marketing manager Michael Roma nakahukom nga i-uswag ang maong kalihukan ngadto sa Pebrero 24 aron aduna pa kini igong panahon sa pagpangandam.
Ang duha ka bag-ong teams nga nikompirmar sa ilang partisipasyon mao ang X-Panthers ug ang University of Cebu, nga nihatod sa kinatibuk-ang siyam ka partisipanteng koponan.
Laing pito naglakip sa University of San Jose-Recoletos, University of the Visayas, Southwestern University, University of Southern Philippines-Foundation, University of San Carlos, Hiroshi ug ang Jaguars.
Ang X-Panthers ug UC girepresentahan nilang Marrisa Lagancia ug Richie Andrino atol sa organizational meeting nga gipatawag ni Ybañez sa miaging gabii diha sa Family Choice Restaurant sa Gorordo Avenue, ning siyudad.
Lain pang nitambong atol sa panagtigum mao sila si Raffy Briones (UV), Cecil Jotojot (officiating official), Elen Pongase (X-Panthers), Neil John Diola (officiating official), Paul Miranda (UC), Kenneth Cinco (Hiroshi), Yoli Rizari (USJ-R), Norvie Labuga (USC), Jordan Paca (USP-F) ug Thelma Datig (SWU).
Ang torneyo mosubay og single round robin format sa classification round diin ang top four teams moabante sa semifinals.
Ang top two qualifiers magsangka sa championship, ang third ug fourth ranked squads mag-ilog sa ikatulong dapit.
Gawas sa mga tropeyo ug medalya, ang kampiyon makabulsa og P5,000, samtang ang second placer makadawat og P3,500. Ang third placers mobulsa og P1,500 ug ang fourth placer makaangkon og P1,000.
Ang registration fee nagkantidad og P500 matag koponan. Ang deadline pagduso sa mga entries karong Pebrero 20 atol sa group's final meeting diha sa White Gold House Restaurant.
Niadtong interesado nga buot magpakisayod, tawag lang ni Ybañez sa (032)255-4423 or 0926-7319004.