Kwarta Padala, Pryce Pharma sa finals

Ang M. Lhuillier Kwarta Padala-Cebu City ug host Holcim Pryce Pharma-MisOr milampaso sa ilang kontra aron pagmartsa ngadto sa kampiyonato sa Mindanao Visayas Basketball Association (MVBA) Gov. Oscar Moreno Cup sa miaging gabii didto sa Xavier University Gym sa Cagayan de Oro.

Ang M. Lhuillier Jewelers ni basketball patron Michel J. Lhuillier ug head coach Raul 'Yayoy' Alcoseba nagsandig sa solido nilang opensa sa naghinapos nga bahin sa duwa aron pagpukan sa Pagadian City, 93-80, samtang ang MisOr ni MVBA Chairman Gov. Oscar S. Moreno yano ra kaayong milubong sa Lanao Royals ni Gov. Imelda Q. Dimaporo,104-72.

Gumikan niini, ang M. Lhuillier ug MisOr maoy naka-angkon og katungod nga mag-ilog sa P100, 000 nga ganti. Ang tinaktakay nga kampiyonato padayon pa nga gikumbatihan samtang ning pagsulat kagabii.

Ang Pagadian igo lamang nakatabla sa iskor nga 76-76 sa nahabiling 5:47 sa duwa gumikan kay si Jett Latonio mipabuto og three point shot aron pagpabalik sa labaw sa Jewelers, 79-76.

Sukad niadto, ang M. Lhuillier mao na ang mikontrolar sa duwa. Si Stephen Padilla maoy miselyado sa kadaugan sa Jewelers human kini milansang og 3-point shot nga nakapa-inat sa ilang labaw ngadto sa 13 puntos, 91-78, sa nahabilin nga usa ka minuto sa duwa.

Si Woodrow Enriquez maoy nangu sa M. Lhuillier bitbit ang 25 puntos, 11 niini iyang gitali sa katapusang kuwarter, samtang si Padilla miamot og 17 puntos.