Bitoon nipukan ni Sevillano aron pagsakmit sa titulo

Si International Master Richard Bitoon, bisan nakatabla kini sa iyang katapusang duwa batok ni Voltaire Sevillano, nakamaneho gihapon kini pagsakmit sa kampiyonato sa Atan Guardo Active Chess Tournament diha sa Robinson's Place.

Si Bitoon nitapos sa maong torneyo bitbit ang unom ka puntos sa seven round nga kumbati uban sa ilang tulo ka pawnpushers nga sila si Rosendo Yamyamin, Adante Ibaryu ug Reynaldo Flores.

Apan si Bitoon maoy nakaangkon sa maong kadaugan human kini niratsa og 22.5 sa median ug 31.5 sa Buchholtz.

Si Yamyamin nidaog batok ni Anthony Makinano sa katapusang hugna aron pagpahiluna sa ikaduhang dapit.

Nipasilong sa ikatulong dapit mao si Ibaryu, bisan og nagtabla kini ni Francisco Abugho sa final round.

Si Reynaldo Flores, kinsa nidaog batok ni Glicerio Padillo, maoy nipatong sa ikaupat ug ang nikapyot sa ikalima nga dapit mao si Francisco Abugho.

Nikompleto sa top ten mao sila si Mario Mangubat (6th), Sevillano (7th), Kin Steven Yap (8th), Bonn Tibod (9th) ug Eden Diano (10th).

Sila si Yves Fiel ug Godfrey Villamor, niambit sab sa kadaugan ni IM Bitoon.

Si Fiel maoy gibayaw isip best under-16 entry ug si Villamor maoy best under-13.

Sila si Fiel ug Villamor parehong niposte og 4.5 points paghuman sa aksiyon.