Jewelers namungot, Royals gilubong

Grabe ang kapungot nga gipakita sa M. Lhuillier Kwarta Padala-Cebu City Jewelers human sa ilang kapildihan sa Holcim Pryce Pharma MisOr dihang ilang gilubong ang Lanao Royals sa iskor nga 97-77 sa nagpadayong Mindanao Visayas Basketball Association (MVBA) Gov. Oscar Moreno Cup sa miaging gabii didto sa Xavier University Gym sa dakbayan sa Cagayan de Oro.

Sa main game, giharos og daog sa Holcim Pryce Pharma-MisOr ang tanan nilang duwa sa eliminasyon ug ang katapusan nilang gibiktima mao ang Pagadian City Explorers, 81-72.

Gumikan niini, ang M. Lhuillier ni basketball patron Michel Lhuillier ug head coach Raul 'Yayoy' Alcoseba maoy milangkat sa ikaduhang dapit bitbit ang baraha nga 2-1.

Ning pagsulat, ang MisOr nakigbinakbakay pa batok sa Royals sa crossover semifinals ug ingon man ang M. Lhuillier nga nakigpinaksitay batok sa Pagadian.

Ang mga mananaog maoy makaangkon og katungod nga makiglahugay sa kampiyonato nga nagtangag og P100,000 nga ganti salapi.

Bisan og walo lamang sila ka buok tungod kay wala kaduwa si Danny Aying tungod sa injury, grabe kaayo ang gipakitang kabagsik sa Jewelers gumikan kay milabaw kini og 34 puntos human sa ikatulong kuwarter, 81-47.

Si Troy Mercader maoy nangulo sa M. Lhuillier bitbit ang 21 puntos, samtang si Stephen Padilla milansang og unom nga 3-point shots aron pagtapos niini og 18 puntos.