Kwarta Padala 'sugamak

Nasugamak ang reigning back-to-back Mindanao Visayas Basketball Association (MVBA) champion M.Lhuillier Kwarta Padala sa ilang pakigsangka batok sa host Holcim Pryce Pharma-MisOr sa iskor nga 85-80 sa ikaduhang adlaw sa MVBA Gov. Oscar Moreno Cup didto sa Xavier University Gym.

Sama sa gihapon si Anton Viloria ang migiya sa MisOr diin ngadto sa ganghaan sa kadaugan pinaagi sa iyang 12 puntos uban sa pag-abag nilang Mark Ababon, Lowell Briones ug Frank Nailon, kinsa niamot og 11 puntos matag-usa alang sa MisOr nga nagpabiling walay pilde sulod sa duha ka duwa.

Nangulo sa pilderong Kwarta Padala nga nagbitbit karon og 1-1 win-loss record mao si Woodrow Enriquez, kinsa niani og 24 puntos, gisundan nilang Jett Latonio 15 puntos ug Stephen Padilla nga nitampo og 14 puntos.

Sa pasiunang duwa, ang Pagadian City midaog batok sa Lanao Royals ni Gov. Imelda Q. Dimaporo sa iskor nga 79-70.

Karong adlawa, sugdan na ang crossover semifinal round diin ang top ranked team moharong sa fourth-ranked team, samtang ang second ug third ranked teams mao sab ang mag-abot alang sa knockout games.

Ang kampiyonato gikatakdang duwaon ugmang adlawa.