Private, public schools giawhag pagsalmot sa Cherifier Forte basketball tournament

Ang mga nagkadaiyang teams gikan sa pribado ug pampublikong eskuwelahan sa dakbayan sa Sugbo gidapit sa pagsalmot sa Cherifier Forte 12 years and under Basketball Tangkad Sagad tournament nga gikatakda karong Marso 17-18 nga duwaon sa duha ka binyo, sa Sacred Heart School-Jesuit gym sa may Gen. Maxilom avenue ug sa Don Bosco College gym sa barangay Punta Princesa, ning syudad.

Mao kini ang gihatag nga impormasyon sa The Freeman/Banat News kagahapon ni ex-San Beda point guard Carlo Britt Reroma, kinsa maoy Cebu leg coordinator uban ni SBC Red Cubs coach Edmundo 'Ato' Badolato, isip tournament director.

Si Reroma, kinsa produkto sa Don Bosco sa wala pa motapon sa San Beda, naglaum nga moabot sa 16 ka teams gikan sa Cebu ang mosalmot ning maong torneyo.

Gibutyag ni Reroma nga ang USC, SHS, Don Bosco ug University of San Jose Recoletos segurado na nga mosalmot sa maong torneyo. Gani, ang USC ug Don Bosco adunay tagduha ka teams, samtang tagsa ang sa SHS ug USJR.

Si Reroma nagkanayon nga mopatawag siya og tigum sa tanang coaches sunod semana.

Ang mga tunghaan sama sa UV, UC, USP ug CEC ug ubang mga public schools ila pang padad-an og imbitasyon aron paapilon sa umaabot nga torneyo.