World Cup of Boxing gisibog

Human napaltos ang ilang negosasyon sa kampo nilang WBO champions Daniel Ponce de Leon ug Jhonny Gonzales, ang SGG Sports Promotions ug ang kaabag niini nga Golden Boy Promotions mihukom nga i-uswag ang World Cup of Boxing tali sa Pilipinas ug Mexico.

Ang maong makasaysayanong promosyon gikatakda unta karong Marso 4, apan si international promoter Sammy Gello-ani nagkanayon nga napugos sila pagsibog niini karong Mayo o Hunyo gumikan sa pagdumili sa mga Meksikano pag-anhi sa Sugbu aron manalipod sa ilang titulo. "Please be informed that we have decided to move the Boxing World Cup to the middle of this year," anunsiyo ni Gello-ani sigun sa press statement nga iyang gipadala kagahapon sa Banat News.

Gipasalig hinuon ni Gello-ani nga ang World Cup anhi gihapon mahitabo sa Pilipinas.

Sa susamang kalamboan, si Gello-ani mipahibawo nga ang mandatory WBO super flyweight title fight tali ni defending champion Fernando Montiel sa Mexico ug Sugbuanong challenger Z Gorres madayon karong Pebrero 24 dinhi sa dakbayan sa Sugbu sa wala pa hisayring binyu.

Sa kasamtangan, si Gello-ani mipadayag nga si international matchmaker Sampson Lewkowicz makig-negotiate og elimination fights alang nila ni Rey 'Boom-Boom' Bautista batok ni WBO No. 2 super bantamweight contender Sergio Medina ug Gerry Peñalosa batok ni WBO No. 1 bantamweight Irene Pacheco.

Ang modaog sa maong elimination bouts mamahimong mandatory challengers nilang Ponce de Leon ug Jhonny Gonzales.