$1M alok ng Golden Boy kay Roach kinumpirma ni Arum

Kinumpirma kahapon ni Top Rank Promotions president Bob Arum ang alok na $1milyon ni Golden Boy Promotions chief Oscar Dela Hoya kay American trainer Freddie Roach para maging trainer nito at igiya sa kanya si Filipino boxing hero Manny Pacquiao.

"Was he offered a deal to become Oscar’s trainer? Yes, absolutely, he was for one million dollars," ani Arum. "That’s why Freddie was instrumental in what Golden Boy did, which was kidnap Manny when he got off the plane from Manila, after 15 hours and take him to the stakehouse."

Sa kanyang pagdating sa Los Angeles, California noong Setyembre para simulan ang kanyang paghahanda sa kanilang "Grand Finale" ni Eric Morales, isang seven-fight contract ang pinapirma ni Dela Hoya kay Pacquiao.

Ito ay kahit na alam nina Dela Hoya at Roach na hindi ito nararapat gawin bunga ng probisyon sa kontrata ni Pacquiao kay Arum bilang promoter nito.

"They had him sign and initial a contract when they knew he was prohibited from doing so. Manny’s lawyer, Jing Gacal, was there and he told Manny not to do it, not to sign it," litanya ni Arum.

Matapos ihayag ni Pacquiao ang kanyang pananatili sa Top Rank Promotions kamakailan, tiniyak ni Roach, kinilalang 2006 Trainer of the Year ng Secondsout.com, ang kanyang patuloy na pamamalagi sa likod ni Pacquiao.

Matatandaang nagtangka na si Roach na iwanan si Pacquiao noong 2004 bunga ng pakikialam ni Murad Muhammad, dating US promoter ni Pacquiao. (RCadayona)