Mano Amon Run mosikad karon

Bisan pa og bisperas sa adlaw sa Pasko apan alang sa mga Cebuano runners dili angay mopahulay kay karong adlawa laing ginukdanay sa kadalanan ang mahitabo sa pagsikad sa 26th Halad Kang Mano Amon Run didto sa Danao City.

Ang lumba manukad ug tapuson sa atubangan sa Danao City Hall sa maong dakbayan.

Gatosan ka mga runners gikan sa nagkalain-laing dapit sa Sugbo ang gipaabot mosalmot ning tinuig nga karera.

Ang Mano Amon Run ikaduha sa pinakadugay na nga running event dili lang dinhi sa Sugbo kondili lukop nasud. Nagsunod lamang kini sa Milo Marathon.

Ang mga kategoriya gilangkuban sa men ug women's open, executive, students ug ang all-Danao.

Samtang ang students' division gilangkuban sa tanang collegiate, secondary ug elementary levels.

Ang open, all-Danao nga mga residente ug ang executive division modagan og 10 ka kilometros, samtang ang executive division, tertiary ug secondary levels modagan og lima ka kilometros.

Ang elementary level, sa ilang bahin modagan lamang og tulo ka kilometros.

Si Christy Sevilleno maoy defending champion sa women's open, samtang si Gilbert Luterte mao sab ang naghari sa men's.

Sa pagsulat niini, ang duha wala pa mikompirmar sa ilang partisipasyon.

Moapil sab og dagan silang Danao City Mayor Ramon 'Nito' Durano III, uban sa iyang anak nga si Department of Tourism secretary Joseph 'Ace' Durano, congressman Red Durano uban ni Danao City councilor Boying Rodriguez.