Tribu Sugbu gipalayas sa Pagadian

Nilampos ang Pagadian Explorers pagpalayas sa Arthro Kontra Arthritis and Skygo-backed Tribu Sugbu pinaagi sa pagpilde niini sa iskor nga 95-86 sa quarterfinals sa 2006 Spring Cooking Oil-NBC National Cup niadtong Miyerkules didto sa St. Michael's Gym sa Iligan City.

Ang kanhi pro nga si Nelson Asaytono nirehistro og game-high 30 puntos aron paghatod sa Explorers ngadto sa semifinals.

Si Asaytono, kinsa igo lang naka-iskor og 10 puntos sa Game-1, niigo og 50 percent (10-for-20) sa iyang mga tirada sa iyang pagtaak sa korte ug nipasulod sa tanan niyang walo ka free throws.

Nakakuha sab siya og maayong suporta ni Fil-Am guard Rob Johnson nga nirampa og bag-ong conference-high 22 puntos, 12 ka assists, pito ka rebounds ug lima ka steals.

Si Tribu Sugbu gunner Doroteo Almacin nisuway unta og luwas sa iyang koponan dihang nipauwan kini og 27 puntos apan dili kini igo para sa kalamposan sa Tribesmen.

Si Mayor Sammy Co sa Explorers makigbagat unya sa defending champion Ozamiz Cotta sa ilang best-of-three semifinal series.