Natulla-Migallen tandem nanghawod

Ang tandem nilang Ronald Natulla ug Jun Migallen nga nipukan nilang Manny Villaruel ug Calvin Cordova sa sunod-sunod nga sets maoy niangkon sa titulo sa 1st Durabend Christmas Cup badminton tournament kagahapon diha sa Racquet Zone sa Montebello Villa Hotel, ning siyudad.

Kontrolado kaayo nila ni Natulla ug Migallen pagsugod sa maong duwa aron pag-angkon sa first set sa makabungog nga labaw, 21-5.

Hinuon, sila si Villaruel ug Cordova nakabawos sa ikaduhang hugna, 6-0, apan sila si Natulla ug Migallen mikubati og balik aron pag-ilog sa labaw, 7-5.

Gikan niadto, sila si Natulla ug Migallen wala na molingi pa hangtod nga ilang naangkon ang maong kadaugan ning binulan nga kompetisyon nga giabagan sa Cebu Sports Media Association (CSMA) ug sa United Architects of the Philippines (UAP) Lapu-Lapu City Chapter nga gipangulohan ni Lawrence 'Lord' Young.

Sila si Natulla ug Migallen miabante sa finals human nanghawod sa elimination round uban ang 3-0 win-loss record.