Nike Basketball Camp gitakda

Ang University of Southern Philippines-Foundation (USP-F) Baby Panthers ug ang University of San Carlos (USC) Baby Warriors mopadala og tag-pito ka high school players alang sa tryouts sa Elite Nike Basketball Camp sunod tuig diha sa Sacred Heart School-Jesuit gym sa Gen. Maxilom avenue ning syudad.

Ang tryouts gitakda sa Enero 28, 2007 gikan sa alas-10:00 sa buntag hangtod sa ala-1:00 sa hapon nga pagadumalaon nilang ex-pro ug coach Eric Altamirano.

Sa Enero 27 sa dili pa ang tryout, adunay pagahimuon nga seminar alang sa mga coaches.

Si coach Camilo Go sa Baby Panthers nagkanayon nga mopadala siya sa iyang pinakaidlas nga high school players sama nilang Francis Dysam, Norman Bordalba, Jr., Rey Michael Cabatingan, Ephraim Elorde, Alfe Dionson, Lawrence Miguil Maraño ug Philip Andrew Muñez.

Samtang si Baby Warriors coach Roland Remedio mopadala sab sa iyang mga lig-ong magduduwa nga gilangkuban nilang Robert Gines Codilla, Bryan Negapatan, Dan Junior Bercede, Joules Frazier Ferrolino, Nilton John Otida, Francis Dave Omolon ug Nico Magat.

Ang CESAFI champion UC Junior Webmasters, runner-up UV Baby Lancers ug Sacred Heart wala pa mohatag kun kinsa ang ilang paapilon sa tryouts.

Moabot ngadto sa 25 ka players gikan sa Cebu ang gipaabot nga moparada sa top 80 junior players nga gustong maapil sa unom ka adlaw nga Elite Basketball Camp didto sa Brent International School sa Mamplasan, Laguna.

Ang maong kalihukan gisuportahan sa Nike ubos sa International Basketball Academy (IBA).

Ang deadline pagduso sa tanang entries unya sa Enero 6, 2007. Ang tanang aplikante magdala lamang og duha ka identification card (ID) ug uban pang mga dokumento nga nagpamatuod nga na-enroll siya sa maong tunghaan.

Gikinahanglan sab nga ang tanang players magsuot og basketball attire atol sa tryouts.

Lima sa 80 ka campers ipadala didto sa 2007 Nike All-Asian Camp diin aduna silay dakung kahigayonan nga mabansay sa mga NBA coaches.