Domingo manalipod sa korona karong adlawa

Si Michael Domingo sa SGG Stable manalipod sa iyang trono isip Philippine bantamweight champion batok ni top-ranked Edgar Gabejan sa Baguio City sa main event sa "Pound for Pound" boxing promotion sugod karong alas 7:00 sa gabii diha sa Talisay City Sports Complex.

Laraw ni Domingo mao ang makabawi sa miaging niyang kapildihan diin siya gipalukapa sa ikasiyam nga hugna ni Frederick Patrac sa France sa ilang World Boxing Foundation (WBF) 118-pound title bout niadtong Oktubre 3 didto sa Palais des Sports sa Agde, France.

Mao kini ang ikatulong pagdepensa ni Domingo sa titulo nga Si Domingo nagtangag og baraha nga 29-15-3 win-loss-draw uban ang 14KOs, apan kausa pa siya nakatilaw og pilde sukad siya nakig-alayon sa SGG Stable ni international promoter Sammy Gello-ani sa naghinapos nga bahin sa tuig 2004.

Sa eksplosibong undercards, si WBA Pan African light flyweight champion Bert Batawang makigharong ni Rey Orais, samtang si ALA Boy Rocky Fuentes makigbinakbakay ni Rolly Mandahinog sa laing 10 ka hugna nga engkuwentro.

Mangtas kaayo si Batawang sa katapusan niyang duha ka away diin iyang gipatikangkang si Noel Veronque sa ikaduhang hugna sa wala pa pakamanga sa ikatulong hugna si Robert Rubillar niadtong Nobiyembre 9 didto sa Danao City Sports and Civic Center.

Aduna say special attraction diin ang way pildeng batos sa ALA Stable nga si Mark Jason Melligen makigbinukbukay ni kanhi RP champion Rex Marzan.

Mo-abli sa maong promosyon mao ang garbo sa dakbayan sa Talisay nga si Rashied Bacus, kinsa makigbinukbukay batok sa boksidor gikan sa dakbayan sa Butuan.

Lain pang mopakita'g aksiyon sa kulbahinam nga pinaksitay mao sila si Reman Salim sa SGG Stable batok Rico Genon, Rogen Flores batok Roel Honor ug Marjo Borres batok Ranie Pamatian.